İqtisadçı alim Qubad İbadoğlu
Milli Məclisin bu gün keçirilən iclasında deputatlar İnam Kərimovu Azərbaycan Respublikası Ali Məhkəməsinin hakimi təsdiq edib. Bundan sonra dövlət başçısının fərmanı ilə o Ali Məhkəmənin sədri təyin ediləcək. Bununla da parlament və prezident Konstitusiyanı, özünün qəbul etdiyi “Məhkəmələr və hakimlər haqqında” Qanunu pozaraq, daha bir pis örnək yaradır. Belə ki, “Məhkəmələr və hakimlər haqqında” Qanunun 94-cü maddəsinə görə, yuxarı instansiya məhkəmələrin hakimi vəzifələrinə bir qayda olaraq ən azı 5 il birinci instansiya məhkəmələrinin hakimi işləmiş şəxslər təyin oluna bilərlər. Qanunun 93-3-cü maddəsinə əsasən, hakim vəzifəsinə namizədlər yazılı və şifahi imtahan əsasında seçilirlər. Həmin Qanunun 93-4-cü maddəsinə görə isə hüquq sahəsində nüfuza, hüquqşünas ixtisası üzrə 20 illik iş təcrübəsinə, yüksək mənəvi keyfiyyətlərə malik olan şəxslər sözügedən prosedurlardan kənar Məhkəmə-Hüquq Şurasının təklifinə əsasən hakim vəzifələrinə təyin edilə bilərlər”. İnam Kərimov hüquqşünas olsa da, bir gün də olsun məhkəmə sistemində nəinki hakim, hətta texniki işçi vəzifəsində çalışmadan ölkənin məhkəmə hakimiyyətinə rəhbər gətirilir.
2002-ci ildə Sorbonne (Paris) Universitetindən məzun olan İnam Kərimov 2002-2012-ci illərdə Prezident Administrasiyasında məsləhətçi, 2012-2018-ci illərdə ASAN Xidmətin sədri, 2018-ci ildən Kənd Təsərrüfatı Naziri vəzifəsində çalışıb. ASAN xidmətdə qazandığı peşəkar nüfuzunu da kənd təsərrüfatı naziri vəzifəsində səriştəzis fəaliyyəti ilə itirib, onun rəhbərliyi dövründə aqrar sektorda inhisarçılıq meylləri daha da güclənib, xüsusilə texniki bitkiçilikdə, taxılçılıqda məhsuldarlıq göstəriciləri pisləşib, kəndlilər pay torparlarından, fermer təsərrüfatlarından məhrum olub, yoxsullaşıb. O nazir vəzifəsinə təyinat alandan sonra fəaliyyətində 3 əsas prinsipə – şəffaflıq, səmərəlilik, hesabatlılıq – əməl edəcəyini bəyan etsə də çox keçmədi ki, kənd təsərrüfatı nazirliyi informasiya sorğularını belə cavablandırmadığına, qeyri-şəffaf və hesabatsız idarəçiliyinə görə qapalı dövlət orqanına çevrildi.
Hesab edirəm ki, İnam Kərimovun Ali Məhkəmənin sədri vəsifəsinə təyinatı Azərbaycanın məhkəmə sistemində əsaslı dəyişikliklərə gətirməyəcək. Bu şəraitdə hətta Azərbaycan Ali Məhkəməsinə Frank Caprionu sədr qoysalar da ciddi dəyişiklik olmayacaq. Odur ki, bütün bunları bilə bilə İnam Kərimovun Ali Məhkəmənin sədri vəsifəsinə təyinatını məhkəmə sistemində islahat kimi təqdim edən hüquqşünasların mövqeyini bölüşmürəm. Çünki, məhkəmə hakimiyyətinin icra hakimiyyətində asılı olduğu ölkədə islahatdan danışmaq gülüncdür.