Ганалик «пайғамбар» ваъда қилган охирзамон содир бўлмади

Йиртиқ бўз халтадан қилинган бутафора чопонни эгнига ташлаб, қўлига ёғоч ҳасса ушлаб тармоқда ваъзлар қилаётган Африкалик дин тужжори 25 декабр куни қиёмат қўпишини башорат қилган ва инсониятни қутқариш учун катта ёғоч кема ясашга киришганини билдирган эди.

Қадимда ўтган Нуҳ пайғамбаридан фарқли африкалик Эбо бу ишга банк ҳисоби учун қулай пул ўтказиш ва донат тизимларини ўрнатиб олганидан кейин енг шимариб ишга киришди. Ўзининг фанердан ясалган бутафора кемаларига одам олиш лимитини чекламади. Қиёматга яқин қуриб битказилиши керак бўлган кемалар сонини саккизтага оширди. Лекин у Худо олдида ваъда қилган охирзамон 25 декабр куни содир бўлмади.   

«Худо бу сафар фикридан қайтди ва кемаларни қуриб битказишимиз учун қўшимча вақт берди», — дея эълон қилди у.

Илгари унинг минглаб издошлари ўз мол-мулкларини сотиб юборишган, чипталар харид қилишган ва «2025 йил 25 декабрь куни Ерни ғарқ қиладиган кучли жалалардан кейинги» уч йиллик сузишга тайёргарлик кўриб, кемалар қурилиш майдончаси олдида навбатга тизилишган эди.

Издошларнинг бир қисми ҳалигача Худо «фикридан қайтганига» ишонишда давом этмоқда. Бошқалар эса қилган хайриялари кемага эмас, балки пуч ёнғоққа сарфланганини тушуна бошлашган.