Фоҳишанинг 50 000 сўми давлат ҳисобига ундирилди

24 ёшли ғиждувонлик Д. А Шофиркон туман “Мингчинор” МФЙ ҳудудининг чўл ҳудуди далаларида фуқаро О.И ва Б.Б билан 50.000 сўм пул эвазига жинсий алоқа қилганлиги аниқланиб, ушбу ҳолат ИИБ ходимлари томонидан расмийлаштирилди. 

Д.А худди шундай ҳуқуқбузарлик учун маъмурий жазо чоралари қўллангандан кейин бир йил давомида такрор шу жиноят билан қўлга олингани маълум бўлди. 

Шофиркон суди Д.Ага маъмурий ҳуқуқбузарлик МЖтКнинг 190-моддаси 2-қисми билан Маъмурий жавобгарлик тўғрисидаги кодексининг 33-моддасини қўллаб, у айбланаётган модда санкциясида назарда тутилган жарима жазосининг энг кам қисмидан ҳам камроқ миқдорда жарима, яъни базавий ҳисоблаш миқдорининг 3 (уч) баравари 1.236.000 (бир миллион икки юз ўттиз олти минг) сўм миқдорида жарима жазоси қўлланишни лозим топди. 

Шунингдек, суд иш бўйича ашёвий далил сифатида олиниб “Ипотека-Банк АТИБ” Бухоро вилоят филиалида сақланаётган 50.000 сўм пулни давлат даромадига мусодара қилди. 

Шундай қилиб, Д.А ўлиб-тирилиб икки мижознинг кўнглини олгани эвазига ишлаб топган “пешона тери”дан ажралиб қолди.