مصر طلعت غنية
مصر غنية لدرجة انها عملت كنيسة (كاتدرائية) و مسجد (الفتاح العليم) تكلفتهم مئات الملايين.
بذلت مجهودات عظيمة جداً، سواء ادارية، هندسية أو مالية، وتم الانجاز في فترة لا بأس بها. محتوى المباني من الداخل من اثاث ومساحات ورسومات واكسسوارات وإضاءة.. فخيم ومكلف لدرجة مبهرة.. الناتج كله بعيد كل البعد عن التواضع المعماري او البساطة..
بس لحد دلوقتي في ملايين من المتشردين وبلا مأوي في شوارع مصر، بيناموا في هذا الطقس البارد في الشارع، علي الأرصفة، تحت الكباري وقدام المحلات اللي احياناً كتير يرفض اصحابها جلوسهم حتي قدامها..
حسب المركز "القومى للبحوث الجنائية" في 2017 في حوالي 16 ألفا طفل شارع في مصر.
من يومين اتنشر بوست علي فيسبوك يحمل خبر موت سيدة ما من شدة البرودة ولانها معندهاش سقف بيت تدفي تحته، فماتت..
في الاف تاني زيي الست دي، بيموتوا من السقعة، سوء التغذية، ولقلة توافر الموارد والطعام..
انقاذهم ومساعدتهم غالباً مش هيكلف مصر نصف المجهودات والميزانية الي اتصرفت علي انشاء الكاتدرائية والجامع..
المباني الي من المفترض انها ديار عبادة اتبنت عشان تمارس فيها الشعائر والطقوس الدينية لطاعة الله وكلام الكتب السماوية.. بس متكرش انه في اي دين من الاديان مكتوب فيه ان حتماً ولابد بناء مباني فخمية بشكل دا عشان نقدر نصلي فيها! بالتأكيد يعني صلاتنا هتتقبل حتي وان كانت في حجرة صغيرة مبنية بناء بدائي بسيط، والاكيد ان جميع الاديان تحث علي الاهتمام بالفقراء والمحتاجين وانه مساعدتهم اهم من شوية حجارة يتصرف عليها ملايين بحجه انه ناس تدخل تصلي فيها..
مفيش حد من رجال الدين اللي بيظهروا ليل ونهار علي القنوات الفضائية يزعقوا ويدعوا الشعب للهداية والالتزام وحب الوطن ظهر في اي برنامج واعترض علي اللي بيحصل او حتي قال ياريت نساعد الفقراء بنفس القدر الي اهتمينا به نبني المباني دي .. بما انه ااعتراض علي افعال الدولة بقا مجازفة اليومين دول ومن الممكن ان يؤدي للسجن والحبس، فعلي الاقل ندعو لعمل الخير زيي ما بندعو ليل ونهار لحب الدولة..
الجمعيات الخيرية والكنائس (بوجهه الأخص) بيعملوا دراسات حالة للتأكد من ان طالب المساعدة فعلاً محتاجها وملوش مصدر دخل أخر، ولو دراسيين الحالة عارفوا اي معلومة ممكن تمنع ان يحصل المحتاج علي مساعدة، بيوقفوا المساعدة فوراً، يمكن دا له بعض الإيجابيات احياناً وبيضمن ان تبرعات الناس وشقاهم وتعبهم ميروحش للغير المحتاجين، بس لما احنا بلد غنية اوي كده لدرجة الي مخليانا نصرف مئات الملايين علي شوية مباني وطوب وحجارة اومال ليه مزنقنها علي الفقرا اوي كده وعاملين دراسات وتحقيقات وحوارات عشان نضمن انهم يستحقوا المعونات والمساعدات قبل ما بنطلع اي قرش ليهم، لما كده كده في فلوس كتير برضه بتروح في ال ولا شئ –الذي وهو مباني فخمية ملهاش اي تلاتين لازم ولا لها علاقة بالدين نهائي –
ومادام بنستخدم العقل والحكمة في أننا ناخد حذرنا قبل ما ندي اي حد يقول "انا محتاج" ، بيروح فين العقل والحكمة دول اما بنصرفهم علي شوية جماد ومباني..
