مازورة النظم السياسية
علشان نحدد اي نظام ايه توجهاته السياسيه لازم نكون متخيلين محورين متعامدين زي النظام الاحداثي الي كنا بناخده في اعدادي وهنقسم الورقه ل اربعه ارباع باستخدام محورين متعامدين .
المحورالاول هو المحور سين الافقي و ده بيوضح علاقه النظام السياسي بالاقتصاد .
يعني يميني ولا يساري ؟ .. سوق مفتوح ولا سوق مقيد ؟.. راسمالي ولا اشتراكي ؟ .. قطاع خاص ولا قطاع عام ؟ .. اليات السوق وعرض وطلب ولا تسعير الحكومه ؟ ... في قانون يمشي عالتخين ولا الاقتصاد في ايد عائلات بعينها تحكم او توالي الحاكم ؟
المحور التاني هو المحور صاد الرأسي و ده بيوضح علاقه النظم السياسي بالحريات .. هل في حريه ولا النظام سلطوي
يعني في حريه تعبير ولا الاقلام مقصوفه ؟ في صحافه حره ولا في اعلام موجه ؟ .. يعني في احزاب حقيقيه تعمل بين الناس بحريه ولا كرتونيه داخل مقراتها ؟.. يعني في حريه تنظيم وتجمع ولا القانون بيمنع او زي ما بيقولوا بينظم؟ ... هل في شفافيه وجلسات البرلمان مذاعه والميزانيات معلنه بالتفاصيل ولا الدنيا متمنتجه والميزانيات رقم واحد اجمالي ؟ .. هل الانتخابات نزيهه وتراقب من الداخل والخارج ولا مفيش انتخابات اصلا ولو فيه بتبقي تحت اشراف غير شفاف ؟ .. هل القانون بيطبق على التخين ولا على المعارضين فقط ؟ .
يعني لو قلنا مثا دول الخليج ..المحور سين بتاعهم كالتالي :
دول اقتصادها فيه سوق مفتوح .. راس مالي .. القطاع الخاص ليه دور كبير لكن الحكومه بتسعر عملتها امام الدولار لكن لا تسعر السلع .. القانون بيمشي على الجميع لكن الاقتصاد بيد عائلات بعينها حاكمه او مواليه للعائله الحاكمه
المحور صاد بتاعهم كالتالي :
مفيش حريه تعبير والصحافه ليست حره والاعلام مؤيد والنظام لا يقبل النقد ولا توجد احزاب ولا يوجد حريه تنظيم ولا تجمع ولا توجد انتخابات اساسا باستثناء الكويت نسبيا وقطعا لا توجد اي وجود لا معارضه معلنه
وبالتالي دول الخليج تقع في الربع التالي " تحت يمين " منفتح نسبيا اقتصاديا سلطوي متشدد سياسيا
