أنت متعاطف مع بنات "أم حسن" ليه ؟؟ عشان بنات ولا عشان منقبات ولا عشان مظلومين ؟؟
أنت اتحمقت بشكل مبالغ فيه للبنات بتوع مطعم أم حسن عشان منقبات .. زي ما كنت محموق وقالب الدنيا عالاعدام بتاع ال6 شباب .. مش لأنك ضد الاعدام لكن لأنهم بدقون .
ده شبه حمقتك ع أردوغان مش خوفا على الديمقراطية ولكن أنه من حزب اسلامي .. ونضالك ضد مقاطعة قطر عشان حكومتها بتدعم الحركات الاسلامية في العالم كله .
لما بتيجي سيرة الدم بتفتكر رابعة وبتنسى اللي قبلها .. ولما بتسمع كلمة اعتقال مبتشوفش غير الاسلاميين اللي في السجون مش حد غيرهم .
بتتفاوت في الدرجات .. في اللي هيتعاطف بنسب .. واللي مش هيتعاطف غير مع الاسلاميين وبس .. الباقي كله يتحرق بجاز .
مش هقولك #فكر_تاني .. وحط ده مكان ده لأن عندنا أمثلة واضحة .
في كام بنت اتعرضت لاعتداء مش مجرد خناقة زي البنات بتوع م حسن .. وانت كان موقفك منها ايه اذا كانت بشعرها ولابسة لبس مش على مزاجك .
طب انت ضد اعدام محمود بدر مثلا لو الدايرة لفت دلوقتي بالعكس ؟؟
طب انت شايف ان حرية دومة حقه ؟؟
طبيعي انك تبقى بتتعاطف بشكل أكبر مع اللي شبهك واللي بيمسك شخصيا .. لكن المشكلة الكبيرة انك تتهم باقي الناس بعدم الانسانية وبتزايد بانهم مش متعاطفين معاك في لحظة انكسارك .
الفكرة هنا انت بتدعم اللي شبهك بس وبتتضامن معاه .. ولا بتقف مع الحق من غير ما تبص مين في القفص ومين برة
أنا هنا بقول مثال عن أغلب جمهور المتعاطفين واللي بيعملوا دوشة عن كل حاجة تخص تيارهم .. لكن في زيهم بس أقل في العدد والتأثير .. لكن بنفس الانحياز .
مثلا بنت بتدعم أي بنت تانية من منطلق انها "أنثى" وبس ، بغض النظر عن موقفها وحقها ، وفي اللي بيدعم أي واحد مسيحي .
وفي اللي بيحدد موقفه بالمقلوب .. هو هيقف ضد الناس أصحاب الفكر أو الشكل أو الجنس الفلاني .. أيا كان
عشان تعرف تراجع نفسك وتحدد مواقف .. لازم تجرد نفسك من الانحيازات .. لازم تقلع كل النضارات اللي بتغير شكل الحقايق وتلبس نضارة شفافة ,, يستوي الناس كلها فيها قدام الحق .
لازم تجرد الحق عشان يبقى ثابت .. وتعرف تحدد موقفك وموقف الأخرين منه في القضايا المختلفة .
لازم تكون عندي مبادئ عشان دي المسطرة اللي هتقيس بيها المسافة بينك وبين الحق .
لازم تتعلم تبص عالصورة من بعيد شوية وتحط نفسك مكان الأخرين .
