رخصة إفطار لو سمحت
زي كل يوم، وصلت الشغل.. دخلت الكافتيريا.. جبت نسكافية وماية.. نقف لحد هنا، طب ليه؟ عشان لما قعدت على مكتبي الناس زعلت وجابت ناس تانية تزعل معاهم، مظبوط.. بسبب النسكافية والماية وإحنا في نهار رمضان (ممكن تعمل هنا إيموشن ضحكة سمجة ونبي).
تعليقات كتير بقي من اللي قلبك يحبها سمعتها من بعض الإخوة الصائمين، تقبل الله منهم ويصبرنا عليهم.. آه يصبرنا على تعليقاتهم اللى بتحسسك طول الوقت أنك مذنب فى حق الإنسانية وحق الهلال مع الصليب.. طب ليه يا شريك الوطن دي ماية هي أكل؟ معلش ثوانى.. هو لو أكل فعلا وليه ريحة حلوة كدا هتعمل فيا إيه؟
من التعليقات اللى حقيقي ضايقتني تعليق :"إذا بليتم فاستتروا".. بليتم يامؤمن! هو أنا عملت إيه غلط عشان تيجي تقولي كدا؟ على قد معرفتي أن تفسير الجزء دا معناه عدم إبراز المعصية وإظهارها للناس، هو شرب النسكافية والماية معصية اليومين دول ولا حاجة يا أخونا؟ حد يقولي طيب؟
الشعور السخيف اللي حسيت بيه وقتها خلى عقلي يروح لشوية افتراضات وماذا لو؟ ماذا لو: عيانة مثلًا ومحتاجة آكل وأشرب وأنا مسلة؟ حامل ومش قادرة أصوم؟ عندي البريود وفاطرة؟ ماذا لو مش عايزة أصوم وربنا عالم باللى فيا … إلخ!
آه صحيح.. البنات بتتكسف تشرب قدامك وبتفضل تأكل وتشرب في الحمام زي الحرامية (سوري للتعبير)، عشان ماتسمعش كلمة مالهاش لزوم منك، بس أنا بقي مش هعمل كدا وما اعتقدش في الدين ليك الحق إنك تمنعني من الأكل والشرب عشان أنت مش قادر تتحكم في نفسك، وياحرام لو شربت قدامك هفكرك بعطشك.. الحلو لسا كيدز ولا حاجة؟
وفي بقى تعليق لطيف كمان وحجة مالهاش أى لازمة بالنسبالي برضو: "راعي مشاعر الزملاء"، أيوة يعني أعمل إيه؟ أموت نفسي 6 ساعات من غير أكل وشرب عشان مشاعر الزملاء؟ أبطل أشرب وأنا بشتغل عشان مشاعر الزملاء؟ طيب ما لزملاء يراعوا مشاعري أنا، ويراعوا احتياجاتي كإنسانة يعني محتاجة تأكل وتشرب وكده.. ولا إيه؟ ماهو كفاية برضو المحلات و القهاوي والمطاعم المقفولة اللى بتحس بنصر أول ما تلقاها مفتوحة، زي ماكفاية سخافة بقي وصوم في صمت وبلاش تقول :"احنا صايمين خلى عندك دم" (طلعت عنصرية أوي أنا وشريرة).
صحيح.. في كتير بيراعوا مشاعري وبيروحوا بنفسهم يجبولى ماية وكتير بيجبلي أكل معاه من البيت عشان عارف أن الدنيا مقفلة (ايموشن قلوب مش هلال وصليب)، الناس دي بقى.. بتكسفك بالذوق وبتخليك تراعي مشاعرهم وإنت من جواك عايز تعمل كدا ومش مجبر، بتخليك تعتذر لو نسيت وشربت قدامهم وردهم اللطيف ومن القلب :"يا بنتي إنتي هتعذبي نفسك ليه".. شفت الفرق؟ ولا قالوا:"استخبي عشان بتعملى حاجة غلط"، ولا نفخ في وشي وكرهني في حياتي كل ما يشوف في أيدي ماية.
