س و ج في الضريبة العقارية
الضريبة العقارية مصطلح اتكرر كتير الفترة اللي فاتت باعتباره جديد علينا، رغم أنه مذكور في القانون رقم 196 لسنة 2008، والقانون رقم 56 لسنة 1954، صحيح مرة يسموها عوايد، ومرة يسموها ضريبة عقارية، بس المعنى واحد، واللي عمله القانون رقم 117 لسنة 2014، أنه أجرى تعديلات عليها.
الحكومة عاوزة بين سنة 2018 و2019 تحصل 792 مليون جنيه ضرايب عقارية، طيب السؤال مين بيدفع الضريبة، اللي بيدفع هو مالك العقار، أو اللي له حق الانتفاع أو الاستغلال شركة بى أو فرد، واللي له حق بالانتفاع هنا مش المقصود بيها حد مأجر شقة من واحد "المستأجر"، لكن المقصود بيها "المؤجر".
طيب أنا مالك شقة أو عمارة، إيه معايير التقييم اللي على أساسها هدفع الضريبة؟ المعايير هي :موقع العقار، واتساع الشارع المقام فيه، وقربه من مناطق الخدمات، والتشطيبات الخارجية.
الضريبة دي هتتطبق على مين؟ على كل العقارات المبنية على أرض مصر، مؤجرة بقى لحد تاني زي ما قولنا فوق، أو أنا ساكن فيها، ولا فاضية، يعني أي مبنى موجود دلوقت داخل في الضريبة فيلا- عمارة- عوامة- جراج- مشتل، أيًا كان موقعا الجغرافي، وفي ضريبة تانية اسمها ضريبة تركيبات، يعني مثلا العمارة ركبت إعلان عليها وبتتقاضوا عن الإعلان دا أجر، هتدفع عليه ضريبة.
طيب في مباني مش هتدفع الضريبة العقارية؟ الحقيقة، آه، بس دي المباني المملوكة للدولة، والمخصصة للشعائر الدينية، والأحواش، والمقابر، والمباني لسا اللي تحت الإنشاء، كمان في مباني معفاة، اللي هي المباني (الشقق- المحلات) اللي ممكن نأجرها في الشهر بأقل من 1200.
امتى ممكن نسددها ؟ موعد سداد الضريبة في أول يناير كل سنة، وتحصل على قسطين متساويين، الأول حتى نهاية شهر يونيو، والثانى حتى نهاية شهر ديسمبر خلال نفس السنة.
السؤال الأهم، هنحسب ازاي الضريبة العقارية؟ هنضرب مثال أنا عندي شقة تمليك تساوي 2 مليون جنيه، هحسب الضريبة إزاي ؟ أولا: يتم تحديد القيمة السوقية الحقيقية للوحدة (القيمة الرأسمالية) بنسبة 60% من إجمالى القيمة السوقية الأصلية. (60% من 2 مليون جنيه = 1200000 جنيه) ثانيا: تحديد القيمة الإيجارية بنسبة 3% من القيمة الرأسمالية. (1200000 × 3 %= 36000 جنيه) ثالثا: تحديد مصروفات الصيانة على الوحدة السكنية بنسبة 30% من قيمتها الإيجارية. (36000×30 %= 10800 جنيه) رابعا: تحديد الوعاء الضريبى من خلال خص القيمة الإيجارية للعقار من مصروفات الصيانة. (36000 -10800 = 25200 جنيه) خامسا: تحدد الوعاء الضريبى الخاضع للضريبة من خلال طرح حد الإعفاء قبل خصم الضريبة من حد الإعفاء المحدد وفقا للقانون وهو 24 ألف جنيه. (25200 -24000 = 1200 جنيه) سادسا: تحديد الضريبة السنوية المستحقة التى سيدفعها الممول من خلال وضع نسبة 10% على الوعاء الخاضع للضريبة. (1200 ×10 % = 120 جنيه) أى أن ما يتم دفعه من مالك الوحدة السكنية والتى تبلغ قيمتها 2 مليون جنيه هو 120 جنيها فقط ضريبة عقارية سنوية، أى 10 جنيهات شهريا.
