اعجاز الغاز !!
هل تعلم ان كامب ديفيد كان من ضمن شروطها حق اسرائيل في الاستفاده من ثروات سيناء باسعار تفضيليه وده كان من شروط انسحابها من حقول بترول البحر الاحمر ؟
وبعد ازدياد الاستهلاك المحلي استطاع مبارك اقناع رابين انه يستبدل بند البترول المصري لانه يكون غاز طبيعي وده مكسب للطرفين .. مصر توفر استيراد البترول لان اسرائيل كده كده عندها بترول خليجي بيجيلها عن طريق شركات وسيطه امريكيه انما الغاز فممكن مصر توفره واقرب من قطر الي كانت عرضت امداد اسرائيل بغازها
الكلام ده مصادره غير موثقه ومليان غموض ككل شئ متعلق باتفاق كامب ديفيد بين مصر واسرائيل وككل شئ ليه علاقه بعلاقات مصر باسرائيل دايما ما يستأثر بيه مقربين من النظام او شركات تمتلكها اجهزته الامنيه
موضوع دايما تغيب عنه الشفافيه من نظام دائما ما يتهم خصومه بالعماله لاسرائيل
لا شك ان لفظ جبنا جون كبير اوي الي ذكرها السيسي في تعليقه على صفقه الغاز الكبيره هو لفظ صحيح لكن هو لم يحدد جبناه في مين
البعض ظن ان الجول في اسرائيل وده غير صحيح اللهم الا اتبار تنازل اسرائيل عن 2 مليار دولار غرامه كسبتها من التحكيم ضدنا "اسيست"
وطبعا مش جول فينا زي ما الكوميكس بتقول، الحقيقه الجول جه في تركيا الي هيا كمان داخله بشكل كبير كطرف اقليمي كان هيستفيد من عدم عقد هذه الصفقه
تركيا ارسلت اسطول بحري للسواحل القبرصيه وكمان ايطاليا ارسلت فرقاطه بحريه لنفس المنطقه لكن بتعليمات عدم الاشتباك
طبعا نعرف قبرص مقسومه لقسمين احدهم يوناني والاخر تركي وبالتالي حصلت مشكله بين اليونان ونصف قبرص اليوناني من جهه وبين تركيا ونصف قبرص التركي بسبب التنقيب في المناطق الاقتصاديه في البحر وبالتالي تركيا بتحاول الطعن في الاتفاق المصري القبرصي لترسيم الحدود البحرية بين مصر وقبرص اليونانية.
اسائيل عندها حقل تامار وليفاباثان وبالمناسبه اول مره اسمع عن الحقلين دول كان من عمرو موسي وقت ترشحه للرئاسه اما اعلن في برنامجه الانتخابي 2012 انه يجب حمايه حقوق مصر في غاز شرق المتوسط والمح ان اسرائيل قد تكون اعتدت على حصتنا في زحمه الثورة وكان هو المرشح الوحيد الي قال الكلام ده في برنامجه الانتخابي.
اسرئيل الي عيزه تصدرغازها للعالم كان من المفترض انه يتم عن طريق خط انابيب يمتد لتركيا مرورا بقبرص ولكن للخلافات السياسيه بين اسرائيل وتركيا وبين تركيا وقبرص استطاعت مصر تغيير الاتفاق علشان اسرائيل تصدره من محطات الاساله المصريه المعطله في دمياط وادكو بعد تراج مصر عن التصدير بسبب تراجع الانتاج وزياده استهلاكنا.
وحيث ان مصر عايزه من ايام مبارك انها تكون مركز عالمي لتداول الغاز يبقي نتوقع اتفاق مماثل مع قبرص قريبا يعني جول تاني كمان قرب
المشكله فين بقي؟
المشكله ان احنا كشعب وكمان كنظام عندنا انفصام في الشخصيه والتفكير والتقرير
ازاي؟
النظام الشمولي من وقت عبدالناصر وهو بارع في الجعجعه والتطاول بالحناجر فقط على كل ما يمت لاسرائيل وامريكا بصله وفي نفس ذات الوقت نرى الرؤساء يلتقطون صورا مع نظرائهم الاسرائليين وعلى وجوههم سعاده مبنشفهاش الا في هذه اللقاءات
يعني السيسي والملك الاردن التقو نتياهو سار من سنه ونصف في العقبة.. مش كده بس .. ده كمان نتنياهو زار السيسي في القاهرة في السر من كام شهر.
وفي نفس ذات ام اللحظه تلاقي ابواق النظام في الاعلام بيتهمو شباب الثوره انهم ممولين من اسرائيل وامريكا لاسقاط مصر 😀
الشعب مازال متشبع بخطاب عبدالناصر الحنجوري لكن الحنجرة دي تطلع على عالم اجتماع زي سعد الدين ابراهيم اما زار جامعه في اسرائيل ومتطلعش على عمرو ايب وهو بيصور من تل ابيب او على وزير الخارجيه وهو بيقابل نتنياهو في اسرائيل
الشعب ممكن يسخن بنوابه واعلامه على توفيق عكاشه ويزغرطو لما يسقطو عضويته لمقابلته سفير اسرئيل في القاهره علنيا لكن يعمل من بنها السيسي يقابل نتياهو في السر او ان صحف اسرائيل تعلن عن استيائهم من قيامهم ب 100 طلعه جويه ضد داعش داخل سيناء !!!
وبالتالي احنا كنظام وكشعب بيكيل بمكيالين ومصابين بالشيزوفرينيا حط عليهم كمان شويه غموض وانعدام شفافيه طبيعي منبقاش قادرين نحدد هل فعلا جبنا جول ؟ طب جيبناه في مين؟ وهل نؤيد ولا نعارض ولا نخون ولا نحتفل وهنفضل على الحال الناصري د لغايه ما نواجه نفسنا دايما بالحقيقه وبالصدق وده مش هيتحقق الا بالديمقراطية .
