مجموع الثانوية العامة ملوش لازمة
كل سنه بستغرب ازاي بعد تغير الأجيال والأفكار الي بتثور علي النمطية، والتمرد الي بيحصل علي التقاليد والعادات ولسه الناس بتهيص وتفرح اما بنتهم او ابنهم يجيب مجموع عالي في الثانوية العامة، ويتنكدوا ويعيطوا لو عيالهم جابوا مجموع قليل..
انا مش قصدي امنع الفرحة، ولا بقلل من تعب الطالب الي مكفي علي الكتاب بقاله شهور، ومقدره داً مصاريف الدروس والفلوس الي بيصرفها الأهل علي اولادهم عشان يبقوا مقصروش في حقهم بأي شكل من الأشكال ويوفرلهم كل حاجة عشان يقدروا يذاكروا ويجيبوا مجموع..
بس كل دا ليه؟؟ ما الزمن والأجيال السابقة اثبتوا انه النتيجة في النهاية واحده.. يعني الي جاب مجموع ودخل كلية قمه والي مجبش مجموع ودخل كلية مش قمة، في النهاية الاتنين بيتخرجوا يطلع عينيهم ويبهدلوا ويدوروا علي شغلانه والتانيه عشان يقدروا يجيبوا اي مصدر دخل يكفيهم ويمكن ميكفهمش برضه ويحتاجوا يشتغلوا ٣ شغلانات، ومصير الاتنين (الي جاب مجموع والي مجبش) واحد
الحالات والاستثناءات الي بيكون مصيرهم غير كده، هما الي بيكونوا من الاول مسنودين، مسنودين علي واسطه، او وظيفة مضمونه في شركة بابا وماما أو أحد الأقارب، أو ورث وخزين متشال لهم عشان اما يتخرجوا يعرفوا يفتحوا عيادة أو صيدلية او اي مشروع خاص بيهم ويحققوا الي بيحلموا بيه..
وف حالات اخري لو مش هتنجح بالواسطة فا علي الاقل هتحتاج تنجح بأجتهادك الي لازم يكون مضاعف عن اي اجتهاد طبيعي يمكن بذله، ومعافرتك وجريك ورا الفرص الي ممكن تصيب وممكن لا، مش بمجموعك في ثانوية العامة ولا بشهادة الكلية ولا التقدير العام الي اتخرجت به.. يعني في كل الأحوال التعليم الجامعي وكل التعليم الي هتتعلمه من البداية حتي الهاية ملوش علاقه بالواقع وسوق العمل بأي صله ومهما كنت ناجح في دراستك مش شط نهائي انك تتخرج تكمل علي نفس نهج النجاح دا في مستقبلك وحياة ما بعد التخرج..
الحياة في مصر غير عادلة كما نعلم جميعاً، يمكن مجاميع الثانويه العامه بتحسس الأهالي والطلاب ب القليل من العدل وانه نتيجة تعبهم ومذاكرتهم جه بفائدة في الآخر، ولو ان حتي دي مش مضمونه، ياما طلاب عملوا تظالم واتضح انه الي صحح لهم ورقهم مكنش فايق وظلمهم في درجات، بس في الأول والاخر برضه التعليم والنتيجة مش مقياس لأي شئ.. لأنه المنهج المصري استيعابه وفهمه يتطلب امكانيات ذهنيه ملهاش علاقة بالذكاء قد ما ليها علاقة بالذاكرة وقدرتك علي الحفظ وثبات المعلومة في دماغك، يعني حتي قدرتك علي حل الأسئلة وحصولك علي الدرجات النهائية في الامتحانات مش نابعة من انه مستوي ال IQ بتاعك عالي (ممكن يكون عالي فعلاً) بس في النهاية امتحانات التعليم المصري بتختبر الذاكرة اكتر ما بتختبر الذكاء والاجتهاد.. ياما طلاب اجتهدت في المذاكرة وقضوا كل وقتهم في المذاكرة ومجبوش مجاميع عشان يمكن ذاكرتهم محدودة ودا ملوش علاقة بقدراتهم العقلية او ذكائهم.
النتيجة في نهاية المطاف واحدة والنجاح والاستقرار المادي مش بيجي من مجموع الثانوية العامة، بيجوا من حظك في الحصول على فرص ومن علاقتك ومعارفك الي غالباً هما الي بيخلقوا لك الفرص دي.
