စစ်ကောင်စီတပ်ကို လက်နက်စွဲကိုင်ပြီးအပြင်းထန်ဆုံးတော်လှန်နေကြတဲ့ စစ်ကိုင်းတိုင်းအပါအဝင် တော်လှန်ရေးအားကောင်းတဲ့ နိုင်ငံတဝှမ်း မြို့နယ် ၃၇ မြို့နယ်ကို စစ်ကောင်စီက စစ်အုပ်ချုပ်ရေးကြေညာလိုက်ပါတယ်။
အဲဒီမြို့နယ် ၃၇ မြို့နယ်ထဲမှာ စစ်ကိုင်းတိုင်းက ၁၁ မြို့ ၊ ချင်းပြည်နယ် ၇ မြို့ ၊ မကွေးတိုင်း ၅ မြို့ ၊ ပဲခူးတိုင်း ၅မြို့ ၊ ကယားပြည်နယ် ၄မြို့ ၊တနင်္သာရီတိုင်း ၂မြို့ ၊ကရင်ပြည်နယ် က ၂မြို့ နဲ့ မွန်ပြည်နယ် ၁မြို့ တို့ပါဝင်တာတွေ့ရပါတယ်။
စစ်ကိုင်းတိုင်းက အင်းတော် ၊ ဗန်းဗောက် ၊ ကောလင်း ၊ ပင်လယ်ဘူး ၊ မြောင် ၊ဆားလင်းကြီး ၊ ပုလဲ ၊ပင်းမာပင် ၊ခင်ဦး ၊ တန့်ဆည် ၊ ရေဦး ၊ မကွေးတိုင်းက ဂန့်ဂေါ ၊ ထီးလင်း ၊ ဆော ၊ပေါက် ၊ မြိုင် ၊ပဲခူးတိုင်း ထန်းတပင် ၊အုတ်ဖို ၊ နတ်တလင်း ၊ပေါင်းတည်၊ပေါက်ခေါင်း ၊ ချင်းပြည်နယ် တီးတိန် ၊ တွန်းဇံ၊ ဖလမ်း ၊ ကန်ပက်လက် ၊ မတူပီ ၊ ထန်တလန် ၊ဟားခါး ၊ ကယားပြည်နယ် ဒီမော့ဆို့ ၊ဖရူဆို ၊ ရှားတော ၊ဘော်လခဲ ၊ကရင်ပြည်နယ် ကြာအင်းဆိပ်ကြီး ၊ကော့ကရိတ် ၊ မွန်ပြည်နယ် ရေးမြို့၊တနင်္သာရီတိုင်း တနင်္သာရီမြို့နဲ့ ပုလောမြို့တွေကို စစ်ကောင်စီက စစ်အုပ်ချုပ်ရေးကြေညာလိုက်တာပါ။
အဲဒီမြို့နယ် တွေ မှာတော်လှန်ရေးအင်အားစုတွေကို ဖမ်းမိရင် စစ်ခုံရုံးနဲ့ အမိန့်တွေချမှာဖြစ်ပြီး သေဒဏ်အထိ အမိန့်ချနိုင်တယ်လို့ စစ်ကောင်စီခေါင်းဆောင်က လုပ်ပိုင်ခွင့်ပေးထားပါတယ်။
NUG အစိုးရရဲ့ ကာကွယ်ရေးဝန်ကြီး ဦးရည်မွန်က စစ်ကောင်စီ စစ်အုပ်ချုပ်ရေးကြေညာလိုက်တဲ့ မြို့နယ် ၃၇ မြို့နယ်ဟာ မြေပြင်အခြေအနေအရ PDF တွေနဲ့ တိုင်းရင်းသားတော်လှန်ရေးအဖွဲ့တွေက စိုးမိုးထားတဲ့ နယ်မြေတွေဖြစ်တယ်လို့ မီဒီယာကိုဖြေထားပါတယ်။
အဲဒီမြို့နယ်တွေမှာ စစ်ကောင်စီတပ်ဟာ တပ်ထဲကနေ အပြင်တောင် မထွက်ရဲတဲ့ မြို့နယ်တွေဖြစ်တယ်လို့ NUG ကာကွယ်ရေးဝန်ကြီးက RFA သတင်းဌာနကိုဖြေထားပါတယ်။
စစ်ကောင်စီဟာ သက်တမ်း ၆ လ ထပ်တိုးပြီးနောက် တော်လှန်မှုအားကောင်းတဲ့ မြို့နယ် ၃၇ မြို့နယ်မှာ စစ်အုပ်ချုပ်ရေးကြေညာလိုက်တာဟာ သတ်ဖြတ်မှုတွေကိုအပြင်းအထန်လုပ်ဆောင်မှာဖြစ်တယ်လို့ တရားလွှတ်တော်ရှေ့နေဦးကြီးမြင့်ကမီဒီယာမှာ ပြောပါတယ်။
” ပိုကြမ်းလာမယ် ၊ပိုရမ်းလာမယ်” လို့ စစ်ကောင်စီရဲ့ခြေလှမ်းကို ရှေ့နေ ဦးကြီးမြင့်က သုံးသပ်ပါတယ်။
