ပခုက္ကူမြို့တွင် တပ်မ(၁၀၁)​၏ ယာဥ် မိုင်းဆွဲတိုက်ခိုက်

စစ်အုပ်စုက မိုင်းထိရာအနီးကျေးရွာ မီးရှို့ဖျက်ဆီးသွား

မကွေးတိုင်း၊ ပခုက္ကူမြို့ရှိ တပ်မ(၁၀၁)မှ ထွက်ခွာလာသော စစ်ကောင်စီယာဥ်ကို မိုင်းဆွဲတိုက်ခိုက်ခဲ့ပြီး မိုင်းထိစစ်ကောင်စီတပ်ကအနီးရှိကျေးရွာအား မီးရှို့ဖျက်ဆီးသွားကြောင်း သတင်းရရှိသည်။

ယမန်နေ့ (ဖေဖော်ဝါရီ ၃ရက်) နံနက် ၈ နာရီ ၁၅မိနစ်ခန့်က ပခုက္ကူ တပ်မ(၁၀၁)မှ ထွက်ခွာလာသော စစ်ကောင်စီ၏ ဖောကားတစ်စီးအား ကန်တော်ကျေးရွာနှင့် ကမ္မမြို့ကြားတွင် မိုင်းပွိုင့် သုံးပွိုင့်ဖြင့် တိုက်ခိုက်ခဲ့ရာ စစ်ကောင်စီတပ်သားများ ထိခိုက်ဒဏ်ရာရရှိသွားကြောင်း မြိုင်(ပကဖ) ခေါင်းဆောင် ကိုလယျာ်က ပြောကြားသည်။

“ပခုက္ကူကနေ ကမ္မ၊ ကိုင်းတောမနဲ့ မြိုင်ဘက်ကိုသွားတာပါ။ အင်အားက ၆ဝ ကျော်လောက်ပါတယ်။”ဟု မြိုင်(ပကဖ) ခေါင်းဆောင်က ပြောသည်။

ထို့နောက် ကင်းပုန်းဝပ်နေသော စစ်ကောင်စီတပ် နှင့်ပျူစောထီး အင်အား ၁၀၀ကျော်က ကန်တော် ကျေးရွာရှိ နေအိမ်များအား မီးရှို့ဖျက်ဆီးသွားကြောင်း ၎င်းက ပြောသည်။

မိုင်းဆွဲခံရသော စစ်ကောင်စီတပ်များသည် လက်နက်ငယ်များဖြင့် ပြန်လည်ပစ်ခတ်ခဲ့ကြောင်း၊ ထိခိုက်သည့် စစ်ကောင်စီတပ်ဖွဲ့ဝင်များအား ပခုက္ကူမှ လူမှုကူညီရေးယာဉ်များဖြင့် သယ်ဆောင်သွားကြောင်း မြိုင်(ပကဖ) ခေါင်းဆောင်က ပြောသည်။

စစ်ကောင်စီတပ်သည် ပခုက္ကူမြို့နယ် ကန်တော်ကျေးရွာကို ပြီးခဲ့သည့် ဇန်နဝါရီ ၃၀ ရက်က တစ်ကြိမ်မီးရှို့ဖျက်ဆီးခဲ့ရာ နေအိမ်ပေါင်း ၇၀ခန့် ပျက်စီးဆုံးခဲ့သည်။ ဇန်နဝါရီ ၃၁ ရက် ကလည်း ပခုက္ကူမြို့နယ် ဆားကျင်းကျေးရွာကို မီးရှို့ဖျက်ဆီးခဲ့ရာ အိမ်‌ခြေ ၃၀ခန့် ပျက်စီးဆုံးရှုံးခဲ့ပြီး အဆိုပါ ကျေးရွာနှစ်ရွာနှင့် အနီးတဝိုက်ကျေးရွာများရှိ ဒေသခံပြည်သူ၂,၀၀၀ခန့် ထွက်ပြေးတိမ်းရှောင်နေရကြောင်း ပခုက္ကူမြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ထားသည်။