စစ်ကိုင်းတိုင်း၊ ဆားလင်းကြီးမြို့နယ်တွင် ငွေသာကျေးရွာ မီးရှို့ဖျက်ဆီးလာသော စစ်ကောင်စီစစ်ကြောင်းအား တိုက်ခိုက်ရာလေးဦးသေဆုံးကြောင်း ယင်းမာပင်ခရိုင်တပ်ရင်း(၂၈) ဓားမဆိုင်းတပ်မတော်(D.M.S.A)က သတင်းထုတ်ပြန်သည်။
ဖေဖော်ဝါရီ ၉ ရက်က ဆားလင်းကြီးမြို့ပေါ်မှ ထွက်လာသော အင်အား ၁၀၀ခန့်ပါ စစ်ကောင်စီတပ်သားများ နှင့်ပျူစောထီးများသည် မွန်းလွဲပိုင်းတွင် ဆားလင်းကြီးမြို့နယ်ရှိ ငွေသာကျေးရွာကို မီးရှို့ဖျက်ဆီးခဲ့သည်။
ထို့နောက် ညနေ ၄နာရီခန့်တွင် ယင်းမာပင်ခရိုင်တပ်ရင်း (၂၈) ဓားမဆိုင်းတပ်မတော် (D.M.S.A)က ဦးဆောင်ကာ လက်နက်ကြီး၊ လက်နက်ငယ်များဖြင့် ထိုးစစ်ဆင်တိုက်ခိုက်ခဲ့ပြီး ၂နာရီကျော်ကြာ ခုခံတိုက်ခိုက်နိုင်ခဲ့ကြောင်း DMSA က အသိပေးသည်။
စစ်ကောင်စီဘက်က လက်နက်ကြီးများဖြင့်ပစ်ခတ်၍ ပြည်သူ့ရဲဘော်များနောက်ဆုတ်ခဲ့ကြောင်း၊ တိုက်ခိုက်မှုကြောင့် စစ်ကောင်စီတပ်ဖွဲ့ဝင် လေးဦး သေဆုံးခဲ့ပြီး ငါးဦးထက်မနည်း ပြင်းထန်ဒဏ်ရာရရှိသွားကြောင်း DMSA၏ ထုတ်ပြန်သည်။
အဆိုပါဖြစ်စဥ်ကို ယင်းမာပင်ခရိုင်တပ်ရင်း(၂၈) ဓားမဆိုင်းတပ်မတော်(D.M.S.A) ဦးဆောင်ပြီးယင်းမာပင်ခရိုင်တပ်ရင်း(၁၁) ကျားသစ်နက်တပ်မတော်တို့ ပူးပေါင်းတိုက်ခိုက်ခဲ့ခြင်းဖြစ်သည်။
ဖြစ်စဥ်နှင့်ပတ်သက်၍ DMSAထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ ထို့အပြင် ထိခိုက်သေဆုံးမှုနှင့်ပတ်သက်ပြီး လူထုနွေဦးက သီးခြားအတည်မပြုနိုင်သေးပေ။
စစ်ကောင်စီတပ်သည် ဖေဖော်ဝါရီလ ၁ဝ ရက်နေ့တွင်လည်း ငွေသာရွာကို ထပ်မံမီးရှို့ဖျက်ဆီးသွားပြီး မီးလောင်ပျက်စီးမှုအခြေအနေ မသိရသေးကြောင်း ဒေသခံများက ပြောသည်။
“ငွေသာရွာသစ်ကို ၉ ရက်နေ့ နေ့လယ် ၁ နာရီလောက် မှာ မီးရှို့တယ်။ ငွေသာရွာဟောင်းကိုကျ ၁၀ ရက်နေ့ မနက် ၈ နာရီလောက်မှာ မီးရှို့သွားတယ်။”ဟု နယ်ခံတစ်ဦးက ပြောသည်။
ဖေဖော်ဝါရီ ၃ ရက်ကလည်း ပုလဲမြို့နယ်၊ အေးကုန်းကျေးရွာမှ ဆားလင်းကြီးမြို့နယ် ကျေးရွာများအား စစ်ကြောင်းထိုးပြီး ဆားလင်းကြီးမြို့ပေါ်သို့ တက်လာသော စစ်ကောင်စီစစ်ကြောင်းကို ပဒေသာမိုင်း(၃)လုံးဖြင့်ကြားဖြတ် တိုက်ခိုက်ခဲ့ရာ စစ်ကောင်စီတပ်ဖွဲ့၇ဦး သေဆုံးကြောင်း ဓားမဆိုင်းတပ်မတော် (D.M.S.A)က ထုတ်ပြန်ထားသည်။
