စစ်ကိုင်းတိုင်း၊ ချောင်းဦးမြို့သို့ ဂျုံလာရောင်းသော ဒေသခံတောင်သူများအား PDFများစိုက်ပျိုးပြုလုပ်သည့် ဂျုံဟုစွပ်စွဲကာ စစ်ကောင်စီတပ်က ဖမ်းဆီးသွားပြီး ကျပ်သိန်း၁၀၀ကျော်ပါ သိမ်းဆည်းသွားကြောင်း ဒေသခံများက ပြောသည်။
ဖေဖော်ဝါရီ ၁၆ရက်က ချောင်းဦးမြို့ပေါ်ရှိ ပွဲရုံတစ်ရုံသို့ ထူးနီကျေးရွာမှ ဂျုံရောင်းလာသော ဒေသခံ တောင်သူငါးဦးအား ပွဲရုံ၌ ရောင်းချပြီး ငွေရှင်းပြီးချိန်တွင် ချောင်းဦးမြို့မရဲစခန်းမှ စစ်အုပ်စုက PDFများစိုက်ပျိုးသည့် ဂျုံဟုစွပ်စွဲကာ အဓမ္မဖမ်းဆီးသွားခြင်းဖြစ်သည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
၎င်းတောင်သူများနှင့်အတူ ဂျုံများတင်ဆောင်လာသော ကားနှစ်စီး၊ ဂျုံရောင်းရသောငွေ ကျပ်သိန်း ၁၀၀ကျော်ကိုပါ အဓမ္မသိမ်းဆည်းသွားကြောင်း Chaung U Revolution အဖွဲ့က ပြောသည်။
”အခုအဖမ်းခံရတဲ့တောင်သူတွေက ဧကအများကြီးစိုက်တာဗျ။ တောင်သူတွေရဲ့ဂျုံတွေရယ်။ ပိုက်ဆံလိုချင်လို့ ဖမ်းတာရယ်။ ဘာ PDFဂျုံမှ မဟုတ်ဘူး”လို့ ဒေသခံပြည်သူတစ်ဦးက Chaung U Revolution ကိုပြောကြားထားသည်။
“PDFဂျုံဆိုရင် ဂျုံကိုအစယူလာစဥ်ကတည်းသိမ်းပေါ့။ ခုတော့ ဂျုံရောင်းနေတုန်း သေချာစောင့် ငွေထုပ်ပိုက်ပြီးပြန်အထွက်မှသိမ်းတာ။ စိတ်မကောင်းဘူး။ မြေဆီ စျေးတွေတက်နေတဲ့ကြားက လုပ်ထားရတာ။”ဟု ဒေသခံတစ်ဦးက ပြောသည်။
ဖမ်းဆီးခံရသော တောင်သူ ငါးဦး ယနေ့အထိ လွှတ်ပေးခြင်း မရှိသေးကြောင်း Chaung U Revolution အဖွဲ့က ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)