စစ်ကောင်စီတပ်နှင့် ပျူစောထီးများ၏ ရန်ကြောင့် နေရပ်စွန့်ခွာတိမ်းရှောင်နေကြရသည့် ပြည်သူ များနှင့် စစ်ကောင်စီတပ်မီးရှို့၍ နေအိမ်များ မီးလောင်ပျက်စီးဆုံးရှုံးခဲ့ရသည့် ပြည်သူများကို ဆန်၊ ဆီနှင့် ငွေကြေး ထောက်ပံ့ပေးအပ်ခဲ့ကြောင်း ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့ (ပအဖ)က ယနေ့ ထုတ်ပြန်သည်။
အဆိုပါ စစ်ဘေးရှောင်နှင့် မီးဘေးသင့်ပြည်သူများကို ဂန့်ဂေါ(ပအဖ)က ထောက်ပံ့မှုများ ယခင်ကလည်း ဆောင်ရွက်ခဲ့ရာ ယခုလအတွင်း ထောက်ပံ့မှုကို ထုတ်ပြန်ခဲ့ခြင်းဖြစ်သည်။
ယခု ဖေဖော်ဝါရီအတွင်း ဂန့်ဂေါမြို့နယ် ကုက္ကားကျေးရွာမှ နေရပ်စွန့်ခွာတိမ်းရှောင်နေရသော ပြည်သူအိမ်ထောင်စု (၃၂)စုအတွက် တစ်အိမ် ထောင်လျှင် ဆန် ခြောက်ပြည်၊ ဆီ၅၀ကျပ်သား စုစုပေါင်း ဆန် (၁၂)တင်း၊ ဆီ (၁၆)ပိဿာ ကိုပေးအပ်ခဲ့သည်ဟု ဆိုသည်။
ထို့ပြင် စစ်ကောင်စီလက်ချက်ကြောင့် နေအိမ် မီးလောင်ဆုံးရှုံးခဲ့ရသော ရဲလှကျေးရွာ အိမ်ထောင် စု သုံးစုအတွက် တစ်အိမ်လျှင် ငါးသောင်းကျပ်စီထောက်ပံ့ခဲ့ကြောင်း ဖော်ပြထားသည်။
လတ်တလောတွင် ဂန့်ဂေါနယ်အတွင်း စစ်ကောင်စီတပ်များ စစ်ကြောင်းထိုးခြင်းမရှိ၍ တိုက်ပွဲမဖြစ်သော်လည်း ဒေသခံများ နေရပ်သို့ မပြန်နိုင်သေးကြောင်း ဂန့်ဂေါဒေသခံတစ်ဦးကပြောသည်။
“ကျွန်မတို့ရွာမှာဆိုရင်တော့ ရွာမှာနေတဲ့သူရော တောထဲမှာနေတဲ့သူရောရှိတယ်။ ရွာရဲ့ မြောက်ဘက်ကဆိုရင်တော့ သူတို့ရွာမှာက အိမ်ကလည်း တစ်လုံးမှ မကျန်တော့ဘူး။ ရွာလည်း မရှိတော့ဘူးလို့ပြောလို့ရတယ်။ အဲဒီလိုဆိုတော့ အားလုံးက တောထဲမှာနေကြတာ”ဟု ဂန့်ဂေါဒေသခံ အမျိုးသမီးတစ်ဦးက ပြောသည်။
ဒေသခံများအနေဖြင့် နေရပ်စွန့်ခွာခဲ့ရ၍ အလုပ်အကိုင်အခွင့်အလမ်းများ အခက်အခဲဖြစ်နေပြီး စားဝတ်နေရေး အခက်အခဲများစွာရှိနေသည်ဟု သူမက ဆိုသည်။
ကူညီထောက်ပံ့ရန်ကျန်ရှိနေသော စစ်ဘေးရှောင်နှင့် မီးဘေးသင့် ပြည်သူများအတွက်လည်း ဆက်လက်ထောက်ပံ့နိုင်ရန် ကြိုးစားလျက်ရှိကြောင်း ထုတ်ပြန်ထားပြီး ပြည်တွင်း၊ ပြည်ပ အလှူရှင်များအနေဖြင့် ပူးပေါင်းပါဝင်ကူညီနိုင် ကြောင်း တိုက်တွန်းနှိုးဆော်ထားသည်။
