စစ်ကောင်စီတပ် သေဆုံးထိခိုက်မှုရှိဟုဆို
စစ်ကိုင်းတိုင်း ကလေးမြို့မှ ချင်းပြည်နယ် ဟားခါးမြို့စစ်ဗျူဟာသို့ ရိက္ခာနှင့် ခဲယမ်း ပို့ဆောင်ရန် ထွက်ခွာလာသည့် စစ်ကောင်စီယာဉ်တန်းကို ယနေ့ တိုက်ခိုက်ခဲ့ရပြီး သေဆုံးထိခိုက်မှုရှိကြောင်း ချင်းအမျိုးသားတပ်မတော်(CNA) ပြောရေးဆိုခွင့်ရှိသူ ဆလိုင်းထက်နီက ပြောသည်။
ယာဉ်အစီးရေ ၃၀ ခန့်ပါသည့် အဆိုပါ စစ်ကောင်စီယာဉ်တန်းသည် မတ်လ ၇ရက်တွင် စစ်ကိုင်းတိုင်း ကလေးမြို့မှ ချင်းပြည်နယ်ဘက်သို့ ထွက်ခွာလာခြင်း ဖြစ်သည်။
“ ချင်းပြည်နယ် ဟားခါး စစ်ဗျူဟာကို ရိက္ခာလာပို့တဲ့ ယာဉ်တန်းကြီးကို အခု တိုက်ပွဲတွေဖြစ်နေပါတယ်။ အဲဒီမှာ ဒီနေ့က တီးတိန်နယ်ထဲမှာ တိုက်ပွဲဖြစ်ပြီးတော့မှ စစ်ကောင်စီတပ်ဖွဲ့တွေက ဒေသကာကွယ်ရေးတပ်ဖွဲ့တွေရဲ့ မိုင်းကွင်းတစ်ခုကို တိုးတော့ အဲဒီမှာ ခြောက်ယောက်သေတယ်။ ၁၄ ယောက် ဒဏ်ရာရတာပေါ့” ဟု ဆလိုင်းထက်နီက ပြောသည်။
ဟားခါးအထိ ရိက္ခာပို့မည့် ယာဉ်တန်းဖြစ်၍ အဆိုပါယာဉ်တန်းကို တိုက်ခိုက်မှုများ လုပ်ဆောင်သွားမည်ဖြစ်ရာ တိုက်ပွဲများပြင်းထန်နိုင်ကြောင်း ဆလိုင်းထက်နီက ပြောသည်။
ချင်းပြည်နယ် ပလက်၀နယ်တွင်လည်း စစ်ကောင်စီတပ်က မတူပီနယ်မှတစ်ဆင့် ရှေ့တန်း ထေဘွေး (ထယ်ဘွေး)တပ်စခန်းသို့ စစ်အင်အားဖြည့်တင်းလျက်ရှိရာ ချင်းအမျိုးသားတပ်မတော်နှင့် ဒေသခံ ချင်းကာကွယ်ရေးတပ်(CDF) တို့ ပူးပေါင်းပြီး ကြားဖြတ်တိုက်ခိုက်မှု လုပ်ဆောင်ခဲ့ရာ စစ်ကောင်စီတပ်က သေဆုံးထိခိုက်ရှိခဲ့သည်။
