မန္တလေးက နာမည်ကြီး ပုဂ္ဂလိက ဆေးရုံ ၃ ရုံကို ယာယီပိတ်ခိုင်းထားရာကနေ လုပ်ငန်းလိုင်စင်ပါ စစ်ကောင်စီက ပိတ်သိမ်းလိုက်ပါတယ်။
လိုင်စင်ပိတ်သိမ်းခံရတဲ့ ပုဂ္ဂလိက ဆေးရုံတွေဟာ မြို့တော်ဆေးရုံ ၊နန်းတော်ဆေးရုံနဲ့ ကံ့ကော်ဆေးရုံ တို့ပဲဖြစ်ပါတယ်။
အဲဒီဆေးရုံတွေဟာ CDM လှုပ်ရှားမှုမှာ ပါဝင်တဲ့ ကျန်းမာရေးဝန်ထမ်းတွေကိုအလုပ်ပေးတယ်ဆိုတဲ့စွပ်စွဲချက်နဲ့ ပြီးခဲ့တဲ့ နှစ်ကုန်ပိုင်းကစတင်ပြီး စစ်ကောင်စီက ဖိအားပေးကာ လက်ရှိအချိန်ထိယာယီပိတ်ခိုင်းထားတာပါ။
![မန္တလေး က ပုဂ္ဂလိက ဆေးရုံ ၃ ရုံကို စစ်ကောင်စီလိုင်စင်ပိတ်သိမ်း](https://i0.wp.com/www.ludunwayoo.com/wp-content/uploads/2023/05/347777182_1248601789375881_8176231011606472631_n.jpg?resize=720%2C540&ssl=1)
ဒီနှစ်ဖေဖော်ဝါရီလထဲမှာ ပြုလုပ်တဲ့ စစ်ကောင်စီ ရဲ့ ပုဂ္ဂလိက ကျန်းမာရေးဆိုင်ရာ ဗဟိုအဖွဲ့အစည်းအဝေးမှာတော့ ဆေးရုံ ၃ ရုံ ကို ၂၀၂၃ ခုနှစ် ဇန်နဝါရီလ ၁ ရက်ကစတင်ပြီး လိုင်စင်ပိတ်သိမ်းဖို့ ဆုံးဖြတ်ခဲ့တာပါ။
လူထုနွေဦးသတင်းဌာနက ဖတ်ရှုရတဲ့ စစ်ကောင်စီရဲ့အမိန့်ကြေညာချက်မှာ မြို့တော်ဆေးရုံ ၊နန်းတော်ဆေးရုံနဲ့ ကံ့ကော်ဆေးရုံ တွေကို ပုဂ္ဂလိက ကျန်းမာရေးဆိုင်ရာဥပဒေ ပုဒ်မ ၁၉(က)အရ လိုင်စင်ပယ်ဖျက်တာလို့အကြောင်းပြထားတာတွေ့ရပါတယ်။
အဲဒီ ပုဒ်မ ၁၉(က)ဟာ လိုင်စင်ပါ စည်းကမ်းတွေကို လိုက်နာဖို့ ဖော်ပြတဲ့ ပုဒ်မဖြစ်ပါတယ်။
![မန္တလေး က ပုဂ္ဂလိက ဆေးရုံ ၃ ရုံကို စစ်ကောင်စီလိုင်စင်ပိတ်သိမ်း](https://i0.wp.com/www.ludunwayoo.com/wp-content/uploads/2023/05/347824275_772025764563746_2989691259302096626_n.jpg?resize=880%2C660&ssl=1)
မန္တလေးက ဆေးရုံ ၊ဆေးခန်းတွေမှာ CDM ကျန်းမာရေးဝန်ထမ်းတွေကို ခန့်ထားတာရှိမရှိ စစ်ကောင်စီတပ်က ရှောင်တခင်ဝင်ရောက်စစ်ဆေးတာတွေရှိခဲ့ပါတယ်။
ဒါအပြင် လူနာဟန်ဆောင်ပြီး CDM အထူးကုဆရာဝန်ကြီးတွေကို ဖမ်းဆီးတာရှိသလို CDM တွေကို အလုပ်ခန့်တယ်ဆိုတဲ့စွပ်စွဲချက်နဲ့ ဆေးခန်းပိုင်ရှင်တွေဖမ်းခံရပြီး ပိုင်ဆိုင်မှုတွေ ချိတ်ပိတ်ခံရတာတွေလည်းရှိခဲ့ပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)