ကရင်အမျိုးသားအစည်းအရုံး(KNU) ကော်သူလေအုပ်ချုပ်နယ်မြေ ညောင်လေးပင်ခရိုင် မုန်းမြို့နယ်အတွင်းရှိ ကျေးရွာများအတွင်းသို့ အာဏာသိမ်းစစ်ကောင်စီတပ်မှ စစ်ကြောင်းထိုးဝင်ရောက်လာ၍ ဒေသခံ ပြည်သူ ၈၀၀ခန့် ဘေးလွတ်ရာသို့ ထွက်ပြေးတိမ်းရှောင်နေရကြောင်း KNUက ယနေ့ ညပိုင်း၌ ထုတ်ပြန်သည်။
မေလ ၁၆ရက်က စစ်ကောင်စီတပ်သည် တမာခေါရွာနှင့် တောင်စု(အနောက်)ရွာအတွင်း စစ်ကြောင်းထိုး ဝင်ရောက်လာပြီး အရပ်သား နှစ်ဦးကို လူသားဒိုင်းအဖြစ် ဖမ်းဆီးခေါ်ဆောင်သွားကြောင်း၊ ဖမ်းဆီးခံရသူ နှစ်ဦးမှာ မေလ ၁၇ရက်တွင် ပြန်လွတ်လာသော်လည်း စစ်ကောင်စီတပ် စစ်ကြောင်းဝင်လာ၍ ဒေသခံများ ဘေးလွတ်ရာသို့ တိမ်းရှောင်ခဲ့ရကြောင်း ဖော်ပြထားသည်။
ထွက်ပြေးတိမ်းရှောင်သူအရေအတွက်မှာ တမာခေါကျေးရွာနှင့် တောင်စု(အနောက်) ကျေးရွာတို့မှ အိမ်ထောင်စု ၂၀၀ကျော်၊ လူဦးရေ ၇၉ဦး ဖြစ်သည်ဟု အသိပေးထားသည်။
အာဏာသိမ်းစစ်ကောင်စီတပ်သည် မေလ ၁၀ရက်က မုန်းမြို့နယ် ညောင်ပင်သာရွာကို ဝင်ရောက်ပြီး ဒေသခံပြည်သူ ၂၀ဦးကို အစုလိုက်၊အပြုံလိုက် သတ်ဖြတ်မှု ကျူးလွန်ခဲ့သည်။
အဆိုပါဒေသတွင် KNUနှင့် စစ်ကောင်စီတပ်အကြား ထိတွေ့တိုက်ပွဲဖြစ်ပွားမှုများရှိခဲ့ပြီး စစ်ကောင်စီတပ်က အရာရှိအပါအဝင်သေဆုံးထိခိုက်မှုများရှိခဲ့ပြီးနောက် ညောင်ပင်သာရွာခံများကို စစ်ကောင်စီတပ် စစ်ကြောင်းက သတ်ဖြတ်မှုကျူးလွန်ခဲ့ခြင်းဖြစ်သည်။
