စစ်ကိုင်းတိုင်း၊ မုံရွာမြို့တွင် အိမ်စီးကားတစ်စီးမောင်းနှင်လာစဥ် ကားမှန်မချ၍ဟုဆိုကာ စစ်ကောင်စီတပ်သားများက သေနတ်ဖြင့်ပစ်ခတ်ကာ ယာဥ်မောင်းအား ဖမ်းဆီးရိုက်နှက်ခဲ့ကြောင်း ဒေသခံများက ပြောသည်။
ယနေ့(မေလ ၁၈ ရက်) နံနက် ၁၁ နာရီဝန်းကျင်က မုံရွာမြို့၊ ကျောက္ကာလမ်းရှိ My Tel ရုံး၌ လုံခြုံရေးချထားသော စစ်သားနှင့်ရဲများက အိမ်စီးကား အနက်ရောင် SURF ကားတစ်စီးကို သေနတ်ဖြင့်ပစ်ခတ်ဖမ်းဆီးကာ ပြန်လှည့်ခိုင်းခဲ့ကြောင်း၊ ထို့နောက် ယာဥ်မောင်းအား My Tel ရုံး၌ ခေါ်ယူရိုက်နှက်ခဲ့ကြောင်း ဒေသခံများက ပြောသည်။
“ကားမှန်ချပြီးမမောင်းလို့ သေနတ်နဲ့ တစ်ချက်လှမ်းပစ်ပြီးခေါ်တာ။ မိုးပေါ်ထောင်ပြီး ခြောက်ပစ် ပစ်တာမဟုတ်ဘဲ သေချာလှမ်းပစ်တာ။ ကားကို ပြန်လှည့်လာဖို့ အော်ခေါ်ပြီးတော့ SURF ကားသမားကို ရုံးထဲခေါ်ပြီး ရဲတွေက ဝိုင်းထိုးတာ။”ဟု မုံရွာမြို့ခံတစ်ဦးက ပြောသည်။
မုံရွာမြို့တွင် စစ်ကောင်စီဂိတ်များအား ဒေသတွင်းတော်လှန်ရေးအင်အားစုများက ကားဖြင့်မကြာခဏ ပစ်ခတ်တိုက်ခိုက်လေ့ရှိကြောင်း ဒေသခံများက ပြောသည်။
မုံရွာရှိ စစ်ကောင်စီဂိတ်များသည် အိမ်စီးကားများလာပါက သတိထားပြီး ပစ်မှတ်သဘောမျိူး သေနတ်ဖြင့် အရန်သင့်ချိန်ရွယ်ထားသည်ဟု ဒေသခံတစ်ဦးက ဆိုသည်။
မေလ ၁၅ ရက်နှင့် ၁၆ ရက်က မုံရွာမြို့ပေါ်ရှိ GTC ကျောင်း၊ ကျွဲရဲ အဝိုင်းပတ်နှင့် ဘိုးဘွားရိပ်သာအဝိုင်းပတ် အနီးရှိ စစ်ကောင်စီတပ်အား မြို့ပြပြောက်ကျားအဖွဲ့များက သွားရောက်ပစ်ခတ်တိုက်ခိုက်ခဲ့သေးသည်။
