စစ်ကိုင်းတိုင်း၊ ပုလဲမြို့နယ်အတွင်းရှိ မိုခါမုန်တိုင်းကြောင့် ပျက်စီးသွားသည့် လမ်းတံတားများအား ဒေသတွင်းပြည်သူ့ကာကွယ်ရေးရဲဘော်များက ပြန်လည်ပြုပြင်ပေးနေကြောင်း မြို့နယ် (ပကဖ)အဖွဲ့က သတင်းထုတ်ပြန်သည်။
လမ်းတံတားပြင်ဆင်မှုများအား ပုလဲမြို့နယ်(ပကဖ) ၊ခရိုင်တပ်ရင်း (၇)နှင့် ABSDF ရဲဘော်များ၊ အခြားဒေသတွင်းတပ်ဖွဲ့ဝင်ရဲဘော်များက ပူးပေါင်းဆောင်ရွက်ပေးနေပြီး တိုက်ပွဲမရှိလျှင် ပြည်သူ့အကျိုးပြုလုပ်ဆောင်မည်ဆိုသည့် ရည်ရွယ်ချက်ဖြင့် ကူညီလုပ်ဆောင်ပေးနေကြောင်း ပုလဲ(ပကဖ)အဖွဲ့က ဆိုသည်။
“ရေကြီးတုန်းကလည်း ပစ္စည်းတွေ ရွှေ့ပြောင်းရာမှာ တက်နိုင်သမျှ ကူညီခဲ့ကြပါတယ်။ ပျက်စီးခဲ့တဲ့ လမ်း၊တံတားတွေကို ပြည်သူတွေအရေးပေါ်သွားလာနိုင်ဖို့ ထန်းလုံးတံတားတွေနဲ့ အစားထိုးခင်းပြီး ဆောက်လုပ်ပေးနေကြပါတယ်”ဟု ပုလဲနယ်အခြေစိုက် ရဲဘော်တစ်ဦးက ပြောသည်။
မေလလယ်က တိုက်ခတ်ခဲ့သည့် မိုခါမုန်တိုင်းကြောင့် ပုလဲမြို့နယ်အတွင်းရှိ တံတား (၁၇)စင်း၊ လမ်းပိုင်း (၂၃)ခုပျက်စီးခဲ့ပြီး စိုက်ပျိုးဧက ၂,၇၀၀ခန့် ပျက်စီးဆုံးရှုံးခဲ့ကြောင်း၊ ထို့အပြင် ကျွဲ၊ နွား၊ သိုး၊ ဆိတ်၊ ဝက်မွေးမြူရေးတိရိစ္ဆာန်အကောင် ၂၀၀ခန့် ရေထဲမျောပါသေဆုံးခဲ့ကြောင်း သတင်းရရှိသည်။
