ကရင်ပြည်နယ်၊ ကြာအင်းဆိပ်ကြီးမြို့နယ် ထဲက စစ်ကောင်စီ ရဲစခန်းနဲ့ ဌာနဆိုင်ရာ ရုံးတွေကို ပြီးခဲ့တဲ့ တစ်ပတ်တာအတွင်း နေ့စဉ်နီးပါး တိုက်ခိုက်ခဲ့တယ်လို့ NUG လက်အောက်ခံ အထူးစစ်ဆင်ရေးအဖွဲ့က ဖော်ပြပါတယ်။
ကြာအင်းဆိပ်ကြီးမြို့နယ် အခြေပြု ခြေမြန်တပ်ရင်း အမှတ် ခမရ ၅၅၈ရဲ့ စစ်စခန်း ၊မြို့မရဲစခန်း ၊ ထွေအုပ်ရုံး ၊မြေစာရင်း ရုံး တွေကို ဒရုန်းတပ်ဖွဲ့ နဲ့ပေါင်းပြီး တိုက်ခိုက်တာလို့သိရပါတယ်။
ဇူလိုင်လ ၁၁ ရက်ကနေ ဇူလိုင်လ ၁၆ ရက် အတွင်း နေ့စဉ်နီးပါး ဒရုန်းနဲ့ ဗုံးချတာ ၊ လက်နက်ကြီး ၊လက်နက်ငယ်တွေနဲ့ ပစ်ခတ်တိုက်ခိုက်တာတွေ လုပ်ခဲ့တယ်လို့ အထူးစစ်ဆင်ရေးအဖွဲ့က ဆိုပါတယ်။
တိုက်ခိုက်မှုအတွင်း စစ်ကောင်စီ တပ်ဖွဲ့ဝင်တွေ ထိခိုက်သေကြေမှုရှိသလို စစ်ကောင်စီရဲ့ ပစ်ခတ်မှုကြောင့် ပူးပေါင်းတပ်ဘက်က ၁ ဦး ဒဏ်ရာရခဲ့တယ်လို့ အထူးစစ်ဆင်ရေးအဖွဲ့က ဖော်ပြပါတယ်။
ကြာအင်းဆိပ်ကြီးမြို့ဟာ KNU တပ်မဟာ ၆ နယ်မြေထဲမှာပါပြီး အခုနှစ်ဆန်းပိုင်းမှာ မြို့ပေါ်မှာရှိတဲ့ စစ်ကောင်စီတပ်ရင်းထဲထိ ကရင့်ပူးပေါင်းတပ်တွေ ဝင်ရောက်တိုက်ခိုက်ခဲ့တာရှိပါတယ်။
