မြန်မာငွေတန်ဖိုး ကျဆင်းနေချိန်မှာပဲ အာဏာသိမ်းစစ်ကောင်စီ ဟာ နှစ်သောင်းကျပ်တန် ကို အခုလကုန်ပိုင်း ဇူလိုင်လ ၃၁ ရက်မှာ ထုတ်မယ်လို့ တရားဝင်ကြေညာလိုက်ပါတယ်။
စစ်ကောင်စီခေါင်းဆောင် နေပြည်တော်မှာ တည်ထားတဲ့ မာရဝီဇယ ရုပ်ပွားတော်မြတ်တည်ဆောက်ပြီးတာနဲ့ ဆင်ဖြူတော် တစ်နှစ်ပြည့်မွေးနေ့ အထိမ်းအမှတ် တို့ အတွက် ထုတ်ဝေတာလို့ ဆိုထားပါတယ်။
ကျပ် နှစ်သောင်းတန်ကို အရေအတွက် အကန့်အသတ်နဲ့သာ ထုတ်ဝေမယ်လို့ စစ်ကောင်စီက ကြေညာချက်မှာပြောထားပါတယ်။
နိုင်ငံအတွင်းသုံးစွဲနေတဲ့ ငွေစက္ကူတွေ ထဲက ဟောင်းနွမ်းပြီး ဆက်သုံးဖို့မသင့်တဲ့ ငွေစက္ကူတွေနဲ့ တန်ဖိုးတူ လဲလှယ်တဲ့နည်းနဲ့ဖြန့်ဝေမှာဖြစ်ပြီး နေပြည်တော် ၊ရန်ကုန်နဲ့ မန္တလေးမှာရှိတဲ့စစ်ကောင်စီ ဗဟိုဘဏ်တွေကနေ လဲလှယ်ပေးမယ်လို့ ပြောထားပါတယ်။
ကျပ် ၂ သောင်းတန်ဟာ အစိမ်းနုရောင် ဖြစ်ပြီး ရှေ့ဘက်မှာ ဆင်ဖြူတော် ပုံ ရိုက်နှိပ်ထားကာ ကျောဘက်မှာတော့ စစ်ကိုင်းတံတားပုံနဲ့ ဧရာဝတီတံတား(ရတနာပုံ ) ပုံ ပါရှိတာတွေ့ရပါတယ်။
