လက်နက်လာပို့သည့် စစ်တပ်က ချင်းတွင်းမြစ်ဘေးရှိကျေးရွာများပစ်ခတ်နေ၍ ဒေသခံများ ထွက်ပြေးတိမ်းရှောင်နေရ

စစ်ကိုင်းတိုင်း၊ မုံရွာမြို့သို့ လက်နက်လာပို့သည့် စစ်ကောင်စီ​၏ မော်တော်ရေယာဉ်သုံးစင်းက ချင်းတွင်းမြစ်ဘေးရှိ ကျေးရွာများအား ပစ်ခတ်နေ၍ ကျေးရွာအများအပြားမှ ဒေသခံများထွက်ပြေးတိမ်းရှောင်နေရကြောင်း ဒေသတွင်း သတင်းရင်းမြစ်များက ပြောသည်။

ယနေ့ (ဇူလိုင် ၂၃ရက်) နံနက်ပိုင်းက ဧရာဝတီမြစ်ကြောင်းမှ ဆန်တက်လာသည့် စစ်ကောင်စီ မော်တော် သုံးစင်းသည် ချင်းတွင်းမြစ်အတွင်းရောက်ရှိလာခဲ့သည်။

အဆိုပါ မော်တော်ယာဉ်များသည် မုံရွာမြို့သို့ လက်နက်လာပို့သည်ဟုသိရပြီး မြစ်ကမ်းဘေးရှိကျေးရွာများအား လက်နက်ကြီးများဖြင့် ရမ်းသမ်းပစ်ခက်နေ၍ ဒေသခံပြည်သူများ မိုးရွာနေသည့်ကြားက ထွက်ပြေးတိမ်းရှောင်နေရကြောင်း ဒေသခံများက ပြောသည်။

မြစ်ရေတက်ချိန်ဖြစ်ပြီး မိိုးများသည်းထန်စွာရွာသွန်းမှုကြောင့် ပြည်သူများဒုက္ခရောက်နေရသည်ဟု ချင်းတွင်းမြစ်ကမ်းဘေးကျေးရွာများသပိတ်ကော်မတီအဖွဲ့ဝင် ကိုအောင်ခန့်ဇော်က ပြောသည်။

“မုံရွာ အလုံမင်းထောင့်ဆိပ်ကမ်းတော့ မရောက် သေးဘူး။ လမ်းတဝက်ပဲရှိသေးတာ။ မုံရွာမြို့နယ်နဲ့ ဆားလင်းကြီးမြို့နယ်ကြား ရောက်နေတယ် “ဟု ၎င်းက ပြောသည်။

ဆားလင်းကြီးမှလာသော စစ်ကြောင်းသည်လည်း ဆားလင်းကြီးတောင်ဘက်ရှိ ဆားခါးကျေးရွာသို့ရောက်ရှိပြီး ပြည်သူပိုင်ပစ္စည်းများကိုခိုးယူနေကြောင်းသိရသည်။

ချင်းတွင်းမြစ်ဘေးကျေးရွာများအပြင် စစ်ကောင်စီစစ်ကြောင်းကြောင့် ဆားလင်းကြီးမြို့နယ်၊ ၀မ်ပေါင်ကြေးနီစီမံကိန်းအနီးက ကျေးရွာများလည်း ဇူလိုင်၂၁ ရက်ကတည်းက ထွက်ပြေးတိမ်းရှောင်နေရသည်။