မကွေးတိုင်း၊ မြိုင်မြို့နယ်တွင် စစ်ကောင်စီလက်အောက်ခံ တွင်းမပျူရွာမှ ညအချိန်မတော် လက်နက်ကြီးဖြင့် ပစ်ခတ်ခဲ့၍ နေအိမ်ထဲ အိပ်နေသည့် ပြည်သူနှစ်ဦးထိခိုက်ဒဏ်ရာရရှိခဲ့ကြောင်း ဒေသတွင်းသတင်းရင်းမြစ်များကပြောသည်။
ယနေ့( ဇူလိုင်လ ၂၆) နံနက် ၂ နာရီခန့်ကတွင်းမ(ပျူ)ရွာ၊ စာသင်ကျောင်းအတွင်းရှိ ပျူစောထီးများသည် လက်နက်ကြီးဖြင့် အကြောင်းမဲ့ ပစ်ခတ်ခဲ့ရာ အိုရင်းကျေးရွာရှိ နေအိမ်တစ်လုံးပေါ် ကျရောက်ခဲ့ခြင်းဖြစ်သည်။
လက်နက်ကြီးကျည်ကြောင့် နေအိမ်တွင်းအိပ်နေသော အသက် (၃၀) ဝန်းကျင် မမိလှ နှင့် အသက် (၁၃) နှစ်အရွယ် မဆုဝင့်ထည်တို့ ဒဏ်ရာ ရရှိသွားကြောင်း နွေဦးတော်လှန်ရေး-မြိုင်မြို့ အဖွဲ့က ပြောသည်။
“အိမ်ထဲမှာ ၃ ယောက်အိပ်နေတာ။ လက်နက်ကြီးကျပြီး ၂ ယောက်ထိခိုက်တာ။”ဟု မြိုင်ပကဖအဖွဲ့ခေါင်းဆောင် ဗိုလ်လက်ယျာက ပြောသည်။
တွင်းမရွာအပါအဝင် မြိုင်နယ်အတွင်းရှိ ပျုရွာအချို့သည် တိုက်ပွဲမဖြစ်ဘဲ လက်နက်ကြီးဖြင့် မကြာခဏ ပစ်ခတ်ခဲ့၍ ပြည်သူများထိခိုက်သေဆုံးမှုများရှိကြောင်းပြောသည်။
ဇူလိုင်လ ၂၅ ရက်နေ့ နံနက်ပိုင်းက ပခုက္ကူမြို့နယ်၊ အနောက်ဘုန်းကန်ရွာပျူစခန်းမှထွက်လာသော စစ်ကောင်စီတပ်သည် မြိုင်မြို့နယ်အရှေ့ပိုင်းကျေးရွာများသို့ စစ်ကြောင်းထိုး မွှေနှောက်နေပြီး ပြည်သူ ၁၀ ဦးထက်မနည်း ဖမ်းဆီးသွားသည်။
