မန္တလေးမြို့ရှိ တစ်တော့ဆယ်လီ ဇော်ဝင်းမောင်အား စစ်ကောင်စီတပ်က လာရောက်ဖမ်းဆီးသွားကြောင်း မြို့ခံများက ပြောသည်။
ယနေ့ (ဇူလိုင် ၂၆ရက်) ညနေပိုင်းက မန္တလေးမြို့၊ လမ်း (၄၀)နှင့် (၈၂) လမ်းထောင့်ရှိ တက်တူးဆိုင်၌ ဝင်ရောက်ဖမ်းဆီးသွားခြင်းဖြစ်ကြောင်း မြို့ခံများက ပြောသည်။
အာဏာသိမ်းစစ်ခေါင်းဆောင် မင်းအောင်လှိုင်အမည်အား ဟာသ တစ်တော့ ရုပ်သံတစ်ခု၌ သုံးစွဲရိုက်ကူးထားသည်ဆိုကာ ၎င်းအား စစ်ကောင်စီ၏ ဝါဒဖြန့်ချန်နယ်များတွင်လှုံ့ဆော်ပြီးနောက် ဖမ်းဆီးခဲ့ခြင်း ဖြစ်သည်။
ယင်းရုပ်သံတွင် လူငယ်တစ်ယောက်အား ဝိုင်းရိုက်နေ၍ ဇော်ဝင်းမောင်က ဝင်ရောက်တားဆီးစဥ် နာမည်မေးလိုက်သောအခါ မင်းအောင်လှိုင်ဟု ပြောဆိုလိုက်၍ ၎င်းကပါ ရိုက်နှက်ပုံစံ ရိုက်ကူးထားခြင်းဖြစ်သည်။
အဆိုပါ ရုပ်သံမှာ လက်တလောကာလတွင် ရိုက်ကူးခြင်းမဟုတ်ဘဲ အာဏာသိမ်းပြီးမကြာမီက ရိုက်ကူးထားခြင်းဖြစ်ပြီး ရုပ်သံဟောင်းအား စစ်ကောင်စီအဖွဲ့သားများက ပြန်လည်ဖော်ပြပြီး ငွေတောင်းခံလိုခြင်းကြောင့် ဖြစ်နိုင်ကြောင်း မြို့ခံအချို့က သုံးသပ်သည်။
“တခြားဘာကိစ္စတွေလည်း ရှိဦးမယ်မသိဘူး။ ပြောရခက်တယ်”ဟု မန္တလေးမြို့ခံတစ်ဦးကပြောသည်။
