“တစ်နိုင်ငံလုံး ဒီလို ရုန်းထမှုမျိုးနဲ့ တစ်ချီ၊နှစ်ချီလောက် ရုန်းထလိုက်ကြရင်ဖြင့် အကြမ်းဖက်စစ်ကောင်စီကို ချက်ချင်းပြိုလဲအောင်လုပ်နိုင်ကြမှာ အသေအချာပဲ”
ကရင်နီပြည်နယ်အတွင်းရှိ တော်လှန်ရေးခေါင်းဆောင်များ နိုင်ငံရေးခေါင်းဆောင်များနှင့် စစ်ရေးခေါင်းဆောင်အားလုံး၏ အမြော်အမြင်နှင့် ကိုယ်စွမ်းကိုယ်စများသည် လက်ရှိအောင်မြင်မှု ရလဒ်များကို ထုဆစ်ပုံဖော်သည့် အခြင်းအရာများဖြစ်ကြောင်း အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက ပြောသည်။
“ကျွန်တော့်အနေနဲ့ ကရင်နီပြည်နယ်ရဲ့ ရုန်းထမှုတွေကို အမြဲတမ်းလိုလို ကြည့်မြင်နေရပါတယ်။ ဒီလို ကြည့်တိုင်း မြင်တိုင်းလည်း ဝမ်းသာပီတိဖြစ်ရသလို၊ အားရတယ်လို့ ပြောရပါလိမ့်မယ်။ ငါတို့ တစ်နိုင်ငံလုံး ဒီလိုရုန်းထမှု မျိုးနဲ့ တစ်ချီ၊နှစ်ချီလောက် ရုန်းထလိုက်ကြရင်ဖြင့် အကြမ်းဖက်စစ်ကောင်စီကို ချက်ချင်းပြိုလဲအောင် လုပ်နိုင်ကြမှာ အသေအချာပဲလို့ စိတ်ထဲမှာ မကြာခဏ ပြောနေမိပါတယ်”ဟု ယာယီသမ္မတက ပြောကြားသည်။
ယနေ့ ကျင်းပသည့် ပြည်ထောင်စုအစိုးရ၊ ပြည်နယ်၊ ဖက်ဒရယ်ယူနစ်များအကြား ပူးပေါင်းဆောင်ရွက်ရေးကော်မရှင်၊ ကရင်နီပြည်ကြားကာလအုပ်ချုပ်ရေးကောင်စီ (IEC)နှင့် ကရင်နီပြည်နယ်အတိုင်ပင်ခံကောင်စီ (KSCC)တို့အကြား ပြုလုပ်သည့် ညှိနှိုင်းအစည်းအဝေး၌ ယာယီသမ္မတက အထက်ပါအတိုင်း ပြောဆိုခဲ့ခြင်းဖြစ်သည်။
ကရင်နီပြည်နယ် ကြားကာလအုပ်ချုပ်ရေးကောင်စီနှင့် ကရင်နီပြည်နယ် အတိုင်ပင်ခံကောင်စီတို့ ပေါ်ပေါက်လာခြင်းသည့် တခြားသောပြည်နယ်နှင့် ဖက်ဒရယ်ယူနစ်များအတွက် ပထမဆုံး စံနမူနာပြုစရာများဖြစ်သည်ဟုလည်း ယာယီသမ္မတက ပြောကြားခဲ့ပြီး အစိုးရအနေဖြင့် ဝမ်းသာဂုဏ်ယူလေးစား အသိအမှတ်ပြုသည်ဟု ဖော်ပြသည်။
“ကျွန်တော်တို့အနေနဲ့ နွေဦးတော်လှန်ရေးအတွင်းမှာ တော်လှန်ရေးလုပ်ငန်းစဉ်တွေကိုလုပ်ရင်း တစ်ဖက်မှာလည်း အုပ်ချုပ်ရေးအရ အခြေခံကျတဲ့ လုပ်ငန်းတွေကို တည်ဆောက်နေကြရပါတယ်။ အခု ကရင်နီပြည်နယ်မှာ ပေါ်ပေါက်လာတဲ့ ကြားကာလ အုပ်ချုပ်ရေးကောင်စီဆိုတာဟာ အုပ်ချုပ်ရေးအရ တည်ဆောက်ရေး လုပ်ငန်းစဉ် တွေကို ခြေခြေမြစ်မြစ် အုတ်မြစ်ချဖို့အတွက် ပေါ်ပေါက်လာတာလို့ ယူဆပါတယ်။ ဒါဟာ အနာဂတ် ဖက်ဒရယ်နိုင်ငံသစ်တည်ဆောက်ရေးမှာ အလွန်အရေးကြီးပါတယ်”ဟု ယာယီသမ္မတက ပြောသည်။
တော်လှန်ရေးအရရော တည်ဆောက်ရေးအရပါ ထူးခြားသည့် ဝိသေသများနှင့် ပြည်စုံနေသည့် ကရင်နီပြည်နယ်ကို တော်လှန်ရေးအင်အားစု အားလုံးက အထူးအာရုံစိုက် စောင့်ကြည့်နေကြကြောင်းလည်း အသိပေးသည်။
“ပြည်သူလူထု တစ်ရပ်လုံးကလည်း တော်လှန်ရေးတပ်ဦးမှာ ကနဦး ပွဲဦးထွက်ကတည်းက အောင်ပွဲအလီလီ ရရှိခဲ့တဲ့ ကရင်နီ ပြည်နယ်ကို ယခုအချိန်အထိ ဝိုင်းဝန်း အားပေးထောက်ခံနေတာ တွေ့ရပါတယ်။ ကရင်နီပြည်နယ်အတွင်းက လုပ်ဆောင်စရာ အဝဝကို ကျွန်တော်တို့ အမျိုးသားညီညွတ်ရေးအစိုးရနဲ့ ယုံကြည်မှု ခိုင်ခိုင်မာမာ တည်ဆောက်ပြီး ဆက်လက် လျှောက်လှမ်းနိုင်လိမ့်မယ်လို့လည်း ယုံကြည်ပါတယ်ဂဟု ယာယီသမ္မတက ပြောကြားသည်။
ကရင်နီပြည်နယ်၏ ကိုယ်ပိုင်ပြဋ္ဌာန်းမှုနှင့် ကရင်နီပြည်နယ် လွတ်မြောက်ရေးအတွက် အားလုံး၏ ပူးပေါင်းအားများဖြင့် စုပေါင်းချင်သည်ဟုလည်း ပြောကြားခဲ့သည်။
