စစ်ကိုင်းတိုင်း၊ ကလေးဝမြို့နယ်၊ အောင်ချမ်းသာကျေးရွာရှိ စစ်ကောင်စီစခန်းကို ဒေသခံပြည်သူ့ကာကွယ်ရေးတပ်ဖွဲ့များဝင်ရောက် တိုက်ခိုက်ပြီးနောက် သုံးရက်ဆက်တိုက် တိုက်ပွဲများပြင်းထန်နေကြောင်း ဒေသခံအချို့ကပြောသည်။
အောင်ချမ်းသာရွာရှိ စစ်ကောင်စီတပ်ကင်းစခန်းကို ဩဂုတ် ၅ ရက်နေ့၊ မနက်ပိုင်း ဒေသခံပြည်သူ့ကာကွယ်ရေးတပ်ဖွဲ့များက ဝင်ရောက်စီးနင်းတိုက်ခိုက်ခဲ့သည်။ စစ်ကောင်စီတပ် ဂျက်ဖိုက်တာဖြင့် ဗုံးကျဲတိုက်ခိုက်ခဲ့ခြင်းဖြစ်သည်ဟု ဒေသခံအချို့ကပြောသည်။
မြေပြင်တွင် အထိနာနေသည့် စစ်ကောင်စီတပ်က ဩဂုတ် ၆ ရက်တွင်ဂျက်ဖိုက်တာဖြင့် ဗုံးကျဲတိုက်ခိုက်ခဲ့သည်။ထို့အပြင်လေကြောင်းအသုံးပြု၍ လူအင်အားဖြည့်တင်းခဲ့ကြောင်းလည်း ဒေသခံတစ်ဦးကပြောသည်။
“စခန်းကို ဝင်တိုက်လို့ လေကြောင်းက ဗုံးကျဲတိုက်နေတာ ဒီနေ့ဆို ၃ရက်ရှိပြီ ။ပြည်သူတွေလည်း အကုန်ထွက်ပြေးနေရတယ်”ဟု ဒေသခံတစ်ဦးကပြောသည်။
တိုက်ပွဲကြောင့် ကလေး-ကလေးဝ-မဟာမြိုင်လမ်းမကြီးတွင် ကားအစီးရေ ၁၀၀ကျော်ပိတ်မိနေသည်ဟု ဒေသခံများကပြောသည်။
“အောင်ချမ်းသာဘက်မှာ တိုက်ပွဲဖြစ်နေတာလို့ကြားတယ်။ ရာသီဥတုကောင်းတာနဲ့ ပစ္စည်းဝယ်လာတာ။ အခုလမ်းမှာ သောင်တင်နေပြီ”ဟု ကားသမားတစ်ဦးကလည်းပြောသည်။
ဩဂုတ် ၆ ရက် နေ့လယ် ၁နာရီခန့်က စစ်ကောင်စီတပ်က Mi35 တစ်စီးဖြင့် အောင်ချမ်းသာရွာနှင့်အနီးအနားကျေးရွာများကို လေကြောင်းမှ ဗုံးကျဲတိုက်ခိုက်ခဲ့သည်ဟု ဒေသခံတစ်ဦးကပြောသည်။
လက်ရှိ ကလေးဝမြို့နယ်၊ အောင်ချမ်းသာရွာ၊ သက္ကယ်ကျင်းရွာ၊ ဆင်အိုင်မရွာစသည့်တို့မှ ဒေသခံပြည်သူ ၃၀၀၀ကျော်ထွက်ပြေးတိမ်းရှောင်နေရသည်ဟု ဒေသခံများကပြောသည်။
တိုက်ပွဲနှင့်ပတ်သတ်ပြီး စစ်ကောင်စီဝါဒဖြန့် သတင်းဌာနများက ဩဂုတ် ၅ ရက် တိုက်ပွဲတွင် CDF/PDFတို့ဘက်နှစ်ဦးကျဆုံးပြီး AKကျည်အိမ် ၈ခု၊ AKကျည် အတောင့် ၃၀၀၊ MG-1လက်ပစ်ဗုံးတစ်လုံး၊ လက်လုပ်လက်ပစ်ဗုံး တစ်လုံး၊ ဖုန်းတစ်လုံးစသည့်တို့ သိမ်းဆည်းရမိသည်ဟုဖော်ပြနေကြသည်။
သုံးရက်တာတိုက်ပွဲအတွင်း စစ်ကောင်စီဘက်ကထိခိုက်သေဆုံးမှုအခြေအနေကိုမသိရသေးကြောင်း ၊စစ်တပ်က အထိနာ၍ လေကြောင်းမှ ပစ်ကူခေါ်ခြင်းဖြစ်ကြောင်း ဒေသခံအချို့ကပြောသည်။
ကလေးဝ မြို့နှင့် မိုင် ၆၀ ခန့်ဝေးသာ ခါမ်းပါတ်မြို့တွင်လည်း ဇူလိုင် ၂၂ ရက်မှ စ၍ ယခုရက်ပိုင်းအထိ့ တိုက်ပွဲများဖြစ်ပွားနေသည်
