စစ်ကိုင်းတိုင်း ကသာမြို့နယ်တွင် ပြည်သူ့အုပ်ချုပ်ရေးအဖွဲ့ အစီအစဉ်ဖြင့် ကျေးရွာများအား လျှပ်စစ်မီးပေးနေသည့် ဓာတ်တိုင်များကို စစ်ကောင်စီစစ်ကြောင်းက မိုင်းဖြင့် ဖောက်ခွဲဖျက်ဆီးခဲ့သည်။
ကသာမြို့နှင့် ရွှေကူမြို့နယ်စပ် ချောင်းဝကျေးရွာအနီးမှ လျှပ်စစ်ဓာတ်တိုင်များကို စစ်ကောင်စီစစ်ကြောင်းက စက်တင်ဘာ၂၅ရက်တွင် ဖောက်ခွဲဖျက်ဆီးသွားခြင်းဟု ကသာမြို့နယ်ပြည်သူ့အုပ်ချုပ်ရေးအဖွဲ့ဝင်တစ်ဦးက ပြောသည်။
“စစ်တပ်က နယ်မြေမစိုးမိုးတော့ ကျွန်တော်တို့က ထိန်းသိမ်းပြီး ကျေးရွာတွေကို လျှပ်စစ်မီးပေးနေတာပါ။စစ်ကြောင်းက ဖောက်ကွဲဖျက်ဆီးသွားပါတယ်။ ဓာတ်တိုင်တွေလည်း လဲကျကုန်တယ်”ဟု ၎င်းက ပြောသည်။
ထိုသို့ဖျက်ဆီးသွား၍ ချောင်းဝ၊ မိုးတားကြီး၊ မြေနု၊ မိုးတားလေး၊ ရွှေပြည်သစ်၊ မဲဟင်း၊ မင်းလယ်၊ ခတက်ချောင်၊ မင်္ဂလသုခ၊ သာစည်၊ နလယ်အင်း၊ ပေါမနှင့် နတ်လှိုင်ကျေးရွာတို့မှာ ယနေ့(စက်တင်ဘာ၂၉ရက်) နေ့လယ်အထိ လျှပ်မီးပြတ်တောက်နေသည်။
စစ်ကောင်စီစစ်ကြောင်းသည် ချောင်းဝရွာအနီးရှိ မင်းကျောင်းကုန်းကျေးရွာ ဘုန်းကြီးကျောင်းတွင် တပ်စွဲနေသဖြင့် ပြင်ဆင်မှုမလုပ်နိုင်သေးပေ။
Public Service Announcement
