စစ်တပ်အာဏာသိမ်းပြီးနောက် နှစ်နှစ်ကျော်အကြာတွင် မြန်မာနိုင်ငံသည် အာဆီယံနိုင်ငံများအနက် ရင်းနှီးမြှပ်နှံရာ၌ ဆုံးရှုံးနိုင်ချေအများဆုံးနိုင်ငံဖြစ်လာကြောင်း ကမ္ဘာတလွှားစီးပွားဆိုင်ရာအချက်အလက်များထုတ်ပြန်နေသည့် Visual Capitalistအဖွဲ့က ထုတ်ပြန်လိုက်သည်။
ကမ္ဘာပေါ်တွင် ရင်းနှီးမြှပ်နှံရာ၌ စွန့်စားရပြီး ဆုံးရှုံးနိုင်ချေအများဆုံးနိုင်ငံများအနက် မြန်မာနိုင်ငံသည် ကမ္ဘာ့အဆင့် ၂၄ ဖြစ်ပြီး အာဆီယံတွင် လာအိုနိုင်ငံနှင့်အတူ ထိပ်ဆုံး၌ ရှိနေခြင်းဖြစ်သည်။
မြန်မာနိုင်ငံသည် ရင်းနှီးမြှပ်နှံရာတွင် စွန့်စားရမှု ၁၅ ဒသမ ၂ ရာခိုင်နှုန်းရှိပြီး စင်ကာပူနိုင်ငံက စွန့်စားရမှု သုည ရာခိုင်နှုန်းဖြစ်သည်။ ထိုကြောင့် စင်ကာပူနိုင်ငံသည် ရင်းနှီးမြှပ်နှံရန် အလွယ်ကူဆုံးနှင့် ဆုံးရှုံးနိုင်ချေမရှိသော နိုင်ငံဖြစ်သည်ဟု အဆိုပါအဖွဲ့က ထုတ်ပြန်ထားသည်။
မြန်မာနှင့်အတူ လာအိုနိုင်ငံက ၁၅ ဒဿမ ၂ ရာခိုင်နှုန်း၊ ကမ္ဘောဒီယားနိုင်ငံက ၈ ဒသမ ၄ရာခိုင်နှုန်းနှင့် ဗီယက်နမ်နိုင်ငံက ၄ ဒသမ ၆ ရာခိုင်နှုန်းရှိသည်ဟုဖော်ပြထားသည်။
ထိုအချက်အလက်များကို နိုင်ငံရေး၊ စီးပွားရေးနှင့် တရားဥပဒေစိုးမိုးရေးကို အခြေခံပြီးတွက်ချက်ခဲ့ခြင်းဖြစ်သည်ဟု အဆိုပါအဖွဲ့ကဆိုသည်။ နိုင်ငံရေးတွင် အစိုးရယန္တယားတည်ငြိမ်မှု၊ အကျင့်ပျက်ခြစားမှုစသည့်တိုကို တိုင်တားပြီး စီးပွားရေးတွင် စီးပွားရေးအဆောက်အအုံခိုင်မာမှုနှင့် ဥပဒေကြောင်းအရ စီးပွားရေးလုပ်ငန်းများပိုင်ဆိုင်မှုစသည့်တို့ကိုတိုင်းတာခြင်းဖြစ်သည်ဟု သိရသည်။
Public Service Announcement
“နိုင်ငံရေးမတည်ငြိမ်တာအပြင် မှုဝါဒတွေခဏခဏပြောင်းနေတာက စီးပွားရေးကဏ္ဍတစ်ခုလုံးကို ထိခိုက်နစ်နာစေခဲ့တာ။ ရှိပြီးသားရင်းနှီးမြှပ်နှံမှုတွေတောင် ပြန်ထွက်နေတာ အသစ်ဝင်လာဖို့ဆိုတာလည်း အရမ်းခက်ခဲပါတယ်”ဟု ရန်ကုန်မြို့အခြေစိုက်စီးပွားရေးလုပ်ငန်းရှင်တစ်ဦးကပြောသည်။
စစ်တပ်အာဏာသိမ်းပြီးနောက် နိုင်ငံခြားရင်းနှီးမြှပ်နှံမှုများကျဆင်းလာပြီး ၂၀၂၂-၂၃ ဘဏ္ဍာနှစ်တွင် နိုင်ငံခြားရင်းနှီးမြှပ်နှံမှု ဒေါ်လာ ၁ ဒသမ ၆၄ ဘီလီယံသာ ဝင်ရောက်ခဲ့သည်။ စစ်တပ်အာဏာမသိမ်းခင်က ၂၀၁၉-၂၀၂၀ ဘဏ္ဍာနှစ်တွင် နိုင်ငံခြားရင်းနှီးမြှပ်နှံမှုဒေါ်လာ ၄ ဒသမ ၈ ဘီလီယံဝင်ရောက်ခဲ့သည်။
