မြန်မာနိုင်ငံရောက် အိန္ဒိယ နိုင်ငံသားတွေ အနေနဲ့ သံရုံးကို ဆက်သွယ်ပြီး စာရင်းသွင်း အသိပေးထားသင့်ကြောင်း အိန္ဒိယ အာဏာပိုင်တွေက တိုက်တွန်းလိုက်ပါတယ်။
နိုဝင်ဘာ ၂၁ ရက်တုန်းက ထုတ်ပြန်တဲ့ အကြံပြုချက်မှာတော့ နိုင်ငံသား အားလုံးဟာ မြန်မာနိုင်ငံမှာ စစ်တပ်နဲ့ တိုင်းရင်းသားတော်လှန်ရေး အင်အားစုတွေကြား ဖြစ်ပွားနေတဲ့ တိုက်ပွဲတွေနဲ့ ပတ်သက်လို့ အလေးထား တုံ့ပြန် စီမံထားဖို့ ဖော်ပြထားပါတယ်။
အခုသီတင်းပတ် ကြေညာချက်မှာတော့ ကာလတို လာရောက်တဲ့ ကမ္ဘာလှည့် ခရီးသည်တွေကလွဲလို့မြန်မာနိုင်ငံရောက် နိုင်ငံသားအားလုံး ရန်ကုန်မှာရှိတဲ့ အိန္ဒိယ သံရုံးမှာ စာရင်းသွင်း မှတ်ပုံတင်ထားကြဖို့ အိန္ဒိယက တိုက်တွန်းထားတာ တွေ့ရပါတယ်။
အဲဒီလို ကြိုတင် ဆက်သွယ် စာရင်းသွင်းထားတဲ့အခါ အရေးပေါ် အခြေအနေ တစ်ခုခု ကြုံလာတာနဲ့ သံရုံး တာဝန်ရှိသူတွေက လိုအပ်တဲ့ အကူအညီတွေပေးဖို့ တုံ့ပြန် ဆောင်ရွက်မှုတွေကို လွယ်ကူ လျင်မြန်စေလိမ့်မယ်လို့ အိန္ဒိယ နိုင်ငံခြားရေး ဝန်ကြီးဌာနကလည်း ထုတ်ပြန်ခဲ့ပါတယ်။
သံရုံးဝက်ဘ်ဆိုက်မှာ တင်ထားတဲ့ မှတ်ပုံတင် ပုံစံကို Downloadယူပြီး အချက်အလက်တွေ ဖြည့်ပေးကြဖို့လည်း မြန်မာနိုင်ငံရောက် အိန္ဒိယ နိုင်ငံသားတွေကို ဝန်ကြီးဌာနက တိုက်တွန်း အကြံပြုခဲ့ပါတယ်။ နောက်ပြီး မိသားစုဝင် တစ်ဦးချင်းစီရဲ့ ရောင်စုံ ပတ်စ်ပို့ဓာတ်ပုံ နှစ်ပုံစီကိုပါ လိုအပ်တဲ့ အခြေအနေမှာ တိုက်ဆိုင် စစ်ဆေးနိုင်အောင် ထည့်သွင်းပေးကြဖို့ အကြံပြုထားပါတယ်။ အဲဒီ စာရင်းသွင်းမှုအတွက် အခကြေးငွေ ပေးဆောင်ဖို့ မလိုဘူးလို့လည်း ဆိုပါတယ်။
Public Service Announcement
အိန္ဒိယဟာ ပြီးခဲ့တဲ့ သီတင်းပတ်ကလည်း နိုင်ငံနယ်စပ်နားမှာ တိုက်ပွဲတွေ ပြင်းထန်လာတာနဲ့ ပတ်သက်လို့ စိုးရိမ်ကြောင်း သဘောထား ထုတ်ပြန်ခဲ့ဖူးပါတယ်။ မြန်မာနိုင်ငံ အနောက်ပိုင်း နယ်စပ်ဒေသတွေမှာ တိုက်ပွဲတွေ ပြင်းထန်လာတဲ့နောက် အိန္ဒိယဖက်ခြမ်း မီဇိုရမ် ပြည်နယ်ထဲ စစ်ရှောင်ပြည်သူ ထောင်နဲ့ချီ ဝင်ရောက်လာတဲ့ အခြေအနေကို အိန္ဒိယက တုံ့ပြန်ခဲ့တာလည်း ဖြစ်ပါတယ်။ အိန္ဒိယရဲ့ ကြေညာချက်မှာ တိုက်ပွဲတွေ အမြန်ဆုံး ရပ်တန့်ပြီး အပြုသဘောဆောင်တဲ့ ဆွေးနွေးမှုတွေ စတင်ဖို့လည်း ထည့်သွင်း တိုက်တွန်းထားခဲ့ပါတယ်။
