ကရင်နီပြည်နယ် လွိုင်ကော်မြို့အခြေစိုက် စစ်ကောင်စီ၏ ခြေလျင်တပ်ရင်း ခလရ(၅၄)တွင် ယနေ့ နေ့လယ်ပိုင်းက ပေါက်ကွဲမှုဖြစ်ပြီး မီးလောင်ခဲ့ကြောင်း ဒေသခံနှင့် စစ်ရေးသတင်းရင်းမြစ်အချို့က ပြောသည်။
ကရင်နီပူးပေါင်းတပ်များ၏ ‘၁၁၁၁ စစ်ဆင်ရေး’၂၁ ရက်မြောက်နေ့(ဒီဇင်ဘာ ၁ ရက်)တွင် လွိုင်ကော်မြို့တွင်း၌ တိုက်ပွဲပြင်းထန်ဆဲဖြစ်ပြီး ခလရ(၅၄)တပ်အတွင်း မီးလောင်ပေါက်ကွဲမှု အသေးစိတ်ကိုမှု စုံစမ်းဆဲဟု ၎င်းတို့က ဆိုသည်။
“နေ့လည် ၁ နာရီ ၁၅လောက်က ဖြစ်တာ။အရင်ဆုံးပေါက်ကွဲသံကြားပြီး မီးခိုလုံးတွေ ထွက်လာမှ ၅၄တပ်ထဲက ဖြစ်တာမှန်းသိတာ။၂ နာရီကျော်လောက်မှာ ငြိမ်သွားတယ်”ဟု လွိုင်ကော်မြို့ဒေသခံတစ်ဦးက ပြောသည်။
ခလရ(၅၄)တပ်သည် မိုင်းလုံးရထားလမ်း၏ ညာဘက်ခြမ်းတွင်ရှိပြီး ဒေသကွပ်ကဲရေးစစ်ဌာနချုပ်(ဒကစ လွိုင်ကော်)နှင့်အနီးဆုံး အခြေစိုက်တပ်တစ်ခု ဖြစ်သည်။
“အခု ပေါက်ကွဲမှု မတိုင်ခင်အထိ စကစဘက်က ခဲယမ်း၊လက်နက်၊လူကို လေကြောင်းကနေအားဖြည့် တဲ့နေရာမှာ ခလရ(၅၄)ကို အဓိကထားအသုံးပြုနေ တာဖြစ်တယ်။ဘာကြောင့် ဖြစ်သွားတယ်ဆိုတာတော့ အတည်ပြုဖို့ခက်တယ်”ဟု ကရင်နီစစ်ရေးသတင်းရင်းမြစ်က ရှင်းပြသည်။
Public Service Announcement
လွိုင်ကော်မြို့တွင် စစ်ကောင်စီ ပင်မအခြေစိုက်ရာ ဒကစ(လွိုင်ကော်အပါအဝင်) ခြေလျင်တပ်ရင်း ခလရ (၂၆၁)၊ ခလရ (၂၅၀)၊ခလရ(၅၄)၊ အမြောက်တပ်ရင်း (အမတ-၃၆၂)၊တပ်မတော်ဆေးရုံ (တဆရ – အမှတ် ၇)၊ထောက်ပို့နှင့် ပို့ဆောင်ရေးတပ်ခွဲ(ထပခ ၇၂၂)တို့ရှိ သည်။
