သေနတ် ၃ လက်နှင့်ခဲယမ်းများ သိမ်းဆည်းရရှိဟု PDF ပြော
မန္တလေးတိုင်း၊ မြင်းခြံမြို့နယ်တွင် အိမ်စီးကားဖြင့်လာသော ရဲများအား ပစ်ခတ်တိုက်ခိုက်ခဲ့ရာ ကားပေါ်လိုက်ပါလာသူ ဒုရဲအုပ်အပါအဝင် ၆ ဦးစလုံး သေဆုံးပြီး သေနတ် ၃လက်နှင့် ခဲယမ်းများ သိမ်းဆည်းနိုင်ခဲ့ကြောင်း မြင်းခြံခရိုင် တပ်ရင်း (၂)Taloke PDF တပ်ဖွဲ့မှ ကိုသိန်းမောင်က ပြောသည်။
ယမန်နေ့ (ဇန်နဝါရီ ၂၂ ရက်)နေ့လယ် ၁၂ နာရီခန့်က မြင်းခြံမြို့နယ်၊ ဆီမီးခုံရဲစခန်းမှ ဒုရဲအုပ် ထင်အောင်ကျော် အပါအဝင် ၆ ဦးသည် မြို့နယ်ရဲတပ်ဖွဲ့မှူးရုံးမှအပြန် ဆီမီးခုံ – မြင်းခြံလမ်းမပေါ် တောပုကျေးရွာနှင့် ဆင်းဂွတ်ကျေးရွာကြား၌ ပစ်ခတ်တိုက်ခိုက်ခဲ့ရာ ကားပေါ်ပါ ၆ဦးစလုံး သေဆုံးခဲ့ခြင်းဖြစ်သည်ဟု ဆိုသည်။
“ကားကို ကျွန်တော်တို့က တားလိုက်တယ်။ ကားကရပ်တယ်။ ရပ်တဲ့အချိန်မှာ မှန်ချခိုင်းတယ်။ မှန်မချဘူး။ သေနတ်ဖောက်ပြီးတော့ မှန်ထပ်ချခိုင်းတယ်။ မချဘူး။ အဲဒီမှာသေနတ်လှုပ်ရှားမှုတွေ့တာနဲ့ ရဲဘော်တွေက ပစ်မိန့်တောင်းတာနဲ့ပစ်မိန့်ပေးပြီး ပစ်ခဲ့ကြတာပါ။”ဟု ကိုသိန်းမောင်က ပြောသည်။
သေဆုံးသူများမှာ ဒုရဲအုပ်ထင်အောင်ကျော်၊ နယ်ထိန်း ကျန်ကျောင်း၊ ရဲတပ်သား စိုးဇေယျာ၊ နတ်ထားရွာမှ ရဲမေသော်သော်မြင့် လင်မယားနှင့် အခြားရဲမေတစ်ဦးတို့ဖြစ်ကြောင်း မြင်းခြံလူထုလှုပ်ရှားမှုကော်မတီက အသိပေးသည်။
Public Service Announcement
၎င်းတို့ကိုင်ဆောင်လာသည့် G3 ၂လက်၊ အူစီတစ်လက်နှင့် G3 ကျည် ၂၀၅ တောင့်၊ ၉ မမ ကျည် ၅၃ တောင့် သိမ်းဆည်းနိုင်ခဲ့ကြောင်း မြင်းခြံခရိုင် တပ်ရင်း (၂)ထံမှ သိရသည်။
အဆိုပါ တိုက်ခိုက်မှုကို မြင်းခြံခရိုင် တပ်ရင်း(၂) Takloke PDF ၊ MP 9 PDF ၊ မိုင်းဇာနည်တပ်ဖွဲ့ Freedom Fighter Guerilla Force – FFGF နှင့် မြောင်(ပလဖ)အဖွဲ့တို့ ပူးပေါင်းကာ တိုက်ခိုက်ခဲ့ခြင်းဖြစ်သည်။
