စစ်ကောင်စီတပ်သားအချို့ အလင်းဝင်လာဟုဆို
ကရင်နီပြည်နယ်၊ ဖားဆောင်းမြို့တိုက်ပွဲ ဆက်လက်ပြင်းထန်နေပြီး အလင်းဝင်လာသည့် စစ်ကောင်စီတပ်ဖွဲ့ဝင်အချို့ရှိကြောင်း ကရင်နီစစ်ရေးသတင်းရင်းမြစ်က ပြောသည်။
ဖေဖော်ဝါရီလကုန်ပိုင်းကစတင်ခဲ့သော ဖားဆောင်းမြို့တစ်ဝိုက်နှင့် မြို့တွင်းတိုက်ပွဲများအတွင်း စစ်ကောင်စီက လေကြောင်းတိုက်ခိုက်မှု အကြိမ်ရေ ၂၀ ကျော်ပြုလုပ်ထားသည်ဟု ဆိုသည်။
“လက်နက်တွေပါတယ်။ ဖားဆောင်းမြို့မ ရဲစခန်းက တပ်သားတွေ။ငါးဦးလောက်ရှိတယ်လို့ လောလောဆယ် သိရတယ်။တိုက်ပွဲကတော့ ပြင်းထန်နေဆဲပဲ”ဟု အထက်ပါ သတင်းရင်းမြစ်က ပြောသည်။
ယမန်နေ့(မတ်လ ၅ ရက်)တွင် ဖားဆောင်းမြို့မရဲစခန်းကို ကရင်နီပူးပေါင်းတပ်များ သိမ်းပိုက်နိုင်ခဲ့ပြီး စစ်ကောင်စီတပ်သားအလောင်းအချို့ ရရှိခဲ့ကြောင်း သီးခြားသတင်းရင်းမြစ်က အသိပေးသည်။
“မနေ့က မနက်ပိုင်းက ရလိုက်တာလို့ သိရတယ်။စကစ အလောင်းနဲ့ ခဲယမ်းအချို့ ရတယ်”ဟု ၎င်းက ပြောသည်။
Public Service Announcement
မြေပြင်၌ရှုံးနိမ့်နေသည့် စစ်ကောင်စီက လေကြောင်း ပစ်ကူအား အဆမတန် အသုံးပြုနေဆဲဖြစ်ပြီး မတ်လ ၃ ရက်က ဖားဆောင်းမြို့၊ကွက်သစ်ရပ်ကွက်ကို ဗုံးကြဲခဲ့ရာ ပြည်သူငါးဦးသေဆုံးကာ ၂၀ ဦးထက်မနည်းဒဏ်ရာရရှိခဲ့သည်။
ဖားဆောင်းမြို့၏ ပြည်သူနေအိမ် ၊ဈေးဆိုင် အဆောက်အဦးများသည် စစ်ကောင်စီ၏ လေကြောင်း တိုက်ခိုက်မှုကြောင့် ၉၀ရာခိုင်နှုန်းခန့် ပျက်စီးဆုံးရှုံးထားသည်။
၂၀၂၀ ခုနှစ် ပြည်နယ်အစိုးရ၏စာရင်းအရ ဖားဆောင်းမြို့ပေါ်တွင် အိမ်ခြေ ၃၉၃လုံးနှင့် လူဦးရေ ၃,၄၀၁ဦးရှိသည်။ဖားဆောင်းမြို့၌ စစ်ကောင်စီ၏ ခလရ(၁၃၄)နှင့်(၁၃၅)တပ်တို့အခြေစိုက်ထားသည်။
