လေကြောင်းမှ တန်ပြန်တိုက်ခိုက်၍ ပြည်သူလေးဦး သေဆုံး
ဟာနာဆန်/People’s Spring
မကွေးတိုင်း၊ မြိုင်မြို့နယ်၊ ပခုက္ကူ – ကမ္မလမ်းပိုင်း၌ စစ်ကောင်စီ၏ ရိက္ခာယာဥ်တန်းတိုက်ခိုက် ခံရ၍ လေကြောင်းမှတိုက်ခိုက်ရာ ပြည်သူ လေးဦး သေဆုံးခဲ့သည်။
ဇွန်လ ၄ ရက်က ပခုက္ကူမြို့အခြေစိုက် တပ်မ (၁၀၁)မှလာသော ချင်းပြည်နယ်၊ မင်းတပ်မြို့ဘက်သို့ ရိက္ခာပို့သည့် စစ်ကောင်စီယာဥ် ၁၃စီးနှင့် အင်အား ၁၅၀ပါ စစ်ကြောင်းကို ပခုက္ကူ-ကမ္မလမ်းပိုင်းတနေရာတွင် ဒရုန်းများဖြင့် ဗုံးသီး အလုံး ၅၀ နီးပါးချ တိုက်ခိုက်ခဲ့ကြောင်း Young Force UGအဖွဲ့က ပြောသည်။
တိုက်ခိုက်မှုကြောင့် စစ်ကောင်စီဘက်က စစ်ကြောင်းမှူးအပါအဝင် ၁၀ဦးသေဆုံးပြီး ၂၈ ဦးခန့်ထိခိုက်ဒဏ်ရာရရှိခဲ့ကြောင်း Young Force UG အဖွဲ့က ဆိုသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
![(စစ်ကောင်စီယာဥ်တန်းတိုက်ခိုက်ခံရပြီးနောက် ကျန်ရစ်ခဲ့သောပစ္စည်းအချို့အား တွေ့ရစဥ်။ ဓာတ်ပုံ - Young Force )](https://i0.wp.com/www.ludunwayoo.com/wp-content/uploads/2024/06/447503303_793118722886922_5861741646706510500_n.jpg?resize=880%2C738&ssl=1)
သို့သော် စစ်ကောင်စီတပ်၏ ထိခိုက်သေဆုံးမှုများအား လူထုနွေဦးက ထပ်မံအတည်ပြုနိုင်ခြင်း မရှိသေးပေ။
” သေတဲ့သူတွေကို မိုးကာနဲ့ စုထုပ်ပြီး သယ်သွားတဲ့အနေအထားရှိတယ်။ အခုတော့အဲဒီယာဥ်တန်းက ကံတော်နဲ့ညောင်ဂျစ်ပင်နားမှာရှိနေတယ်။ အီနာဂါဗုံးနဲ့ချတာတွေကြောင့် သူတို့ကားတွေပျက်စီးပြီး ပြုပြင်ဆဲအနေအထားမှာရှိတယ်။ ဆက်မထွက်နိုင်သေးဘူး။ ဒါပေမယ့် ဒီကနေ့မနက်အထိ MI-35 နဲ့ အဲဒီယာဥ်တန်းအတွက် လုံခြုံရေးပေးနေတာမျိုးရှိတယ်။”ဟု Young Force UG အဖွဲ့၏ သတင်းနှင့်ပြန်ကြားရေးတာဝန်ခံ ကိုပိန်က ပြောသည်။
အထိနာသွားသည့်စစ်ကောင်စီတပ်က အနီးရှိ ကံမြင့်ကုန်းကျေးရွာကို နံနက် ၉ နာရီ ၁၅ မိနစ်နှင့် ၉ နာရီခွဲခန့်က လေကြောင်းမှ နှစ်ကြိမ်တိုက်ခိုက်ခဲ့ရာ ကလေးနှင့် အဘွားအိုအပါအဝင် အမျိုးသမီး လေးဦးသေဆုံးကာ ၁၆ဦး ထိခိုက်ဒဏ်ရာရခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
![(စစ်ကောင်စီယာဥ်တန်းတိုက်ခိုက်ခံရပြီးနောက် ကျန်ရစ်ခဲ့သောပစ္စည်းအချို့အား တွေ့ရစဥ်။ ဓာတ်ပုံ - Young Force )](https://i0.wp.com/www.ludunwayoo.com/wp-content/uploads/2024/06/446788842_793118689553592_4702054100457500041_n.jpg?resize=880%2C738&ssl=1)
“ပေါင် ငါးရာဗုံးနဲ့ ရော့ကတ်သီးတွေ။ ရော့ကတ်သီးကတော့အတွဲလိုက်ပစ်ချခဲ့တာ။ ပေါင်ငါးရာဗုံးသီးက တစ်လုံးချတယ်။ မိသားစုနှစ်စုက မိသားစုဝင်တွေတော်တော်များများ ထိခိုက်ဒဏ်ရာရတာနဲ့သေကုန်ကြတာ။”ဟု ဒေသခံတစ်ဦးက ပြောသည်။
ထို့အပြင် နေအိမ် နှစ်လုံးထက်မနည်း ပျက်စီးပြီး အိမ်မွေးတိရိစ္ဆာန်အချို့လည်း သေဆုံးမှုရှိကြောင်း ဒေသခံများထံမှ သိရသည်။
စစ်ဆင်ရေးအား ပခုက္ကူ၊ ကမ္မနှင့် မြိုင်မြို့နယ်မဟာမိတ်တပ်ဖွဲ့များနှင့် ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့၂မှ Thurain-TR(Pakokku)နှင့် Young Force UG တို့ပူးပေါင်းတိုက်ခိုက်ခဲ့ခြင်းဖြစ်သည်။
Young Force UG နှင့် မဟာမိတ်များသည်ဇွန်လ ၃ ရက်ကလည်း ပခုက္ကူမြို့နယ်၊ အနောက်ဘုန်းကန်ရွာရှိ စစ်ကောင်စီတပ်နှင့်ပျူများအား ရော့ကတ်များဖြင့် ပစ်ခတ်တိုက်ခိုက်ခဲ့သေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)