နိုဝင်ဘာ-၂ ၊ ၂၀၂၅။မိုမို/People’s Spring
မကွေးတိုင်း၊ပေါက်မြို့နယ်တောင်ပိုင်းကို စစ်ကြောင်းထိုးလာတဲ့ စစ်တပ်စစ်ကြောင်းမှစစ်သားသုံးဦးအရှင်ဖမ်းမိပြီး အလောင်းတချို့နဲ့ လက်နက်ခဲယမ်းတွေသိမ်းရတယ်လို့ Young Revolution Front (YRF)က တာဝန်ရှိသူ ကိုလွင်မိုးသန့်က လူထုနွေဦးကို ပြောပါတယ်။
ဆိပ်ဖြူအခြေစိုက် အမှတ် (၂၂)ကာကွယ်ရေးပစ္စည်းစက်ရုံ (ကပစ -၂၂ ) ကနေတပ်မ (၉၉) လက်အောက်ခံ တပ်ရင်းသုံးရင်းကအောက်တိုဘာလ၂၉ ရက်နေ့က စပြီး စစ်ကြောင်းထိုးလာတာလို့ ဆိုပါတယ်။
တပ်မ(၉၉)လက်အောက်ခံ တပ်ရင်း ၁၀၉ ၊ ၄၁၉ ၊ ၁၄ တို့ ပူးပေါင်းထားတဲ့ အင်အား ( ၄၀၀ ) ဝန်းကျင်က အောက်တိုဘာ ၂၉ ရက်က ရေတွက်ရွာစာသင် ကျောင်းမှာ ညအိပ်စခန်းချပြီး အောက်တိုဘာ ၃၀ ရက်ညနေပိုင်းမှာ ရှားပင်ရေရွာနှင့် ရိုးကြီးအနီးပြည်သူနှစ်ဦးကို သတ်ဖြတ်ခဲ့တယ်လို့ အသိပေးပါတယ်။
Public Service Announcement
အဲဒီနောက် အောက်တိုဘာလ ၃၁ရက်နေ့ မနက် ၂ နာရီဝန်းကျင်မှာ ချက်ကန်ရွာအနီးက ပုသိမ်-မုံရွာလမ်းမပေါ်သို့ရောက်ရှိလာလို့ YRF နဲ့ ပခုက္ကူခရိုင်အမှတ် ၁၂ တပ်ရင်း ရဲဘော်တွေ စစ်တပ်စစ်ကြောင်းကို အနီးကပ်စောင့်ကြည့်လိုက်ပါခဲ့တယ်လို့ သိရပါတယ်။
မနက်အစောပိုင်းမှာချက်ကန်ရွာစာသင်ကျောင်းအတွင်းကိုစစ်တပ်စစ်ကြောင်းဝင်ရောက်ခဲ့ပြီး အနီးကပ်စောင့်ကြည့်နေစဥ် ရွာထဲကအိမ်တွေကို မွှေနှောက်မီးရှို့ကာ ပြည်သူနေအိမ်တွေကနေ ကြက် ၊ ဝက် တို့ကို သတ်ဖြတ်စားသောက်ဖို့လုပ်ခဲ့တယ်လို့ ဆိုပါတယ်။
“ မနက်၂နာရီလောက်မှာ စာသင်ကျောင်းထဲ ရောက်တယ်။နားပြီးတော့ ၄ နာရီခွဲ ၅ နာရီလောက်မှာကျွန်တော်တို့ကလည်းနောက်ကနေ ကပ်လိုက်ခဲ့တာဆိုတော့ အနီးဝန်းကျင်ကို စောင့်ကြည့်တယ်။အဲဒီမှာ ပြည်သူတွေရဲ့နေအိမ်တွေကို မွှေနှောက်မီးရှို့၊ဝက်တွေသက်စား။ကြက်တွေ လိုက်ပါတ်ခိုး။အဲဒီအနီးဝန်းကျင်က အိမ်တစ်အိမ်ကို ရောက်လာတယ်။သုံးယောက်မှာတစ်ယောက်က အလက်မပါဘူး။ကျန်တဲ့ နှစ်ယောက်က MA 2 တစ်လက် MA 3 တစ်လက် နဲ့သူတို့ရဲ့စစ်ဝတ်တန်ဆာအပြည့်အစုံနဲ့ပေါ့။အဲဒီလို အချိန်သူတို့ပတ်ဝန်းကျင်မှာ တခြားသူတို့တပ်သားတွေ ရှိမနေတဲ့အတွက်အိမ်ကိုဝိုင်းပြီး တစ်ခါတည်းဝင်ဖမ်းလိုက်တာ” လို့ကိုလွင်မိုးသန့်က ပြောပါတယ်။
စစ်သား သုဦးကိုင်ဆောင်တဲ့ လက် နက်နှစ်လက်နဲ့အတူ ကျည် ၊ လက်ပစ်ဗုံး ၊ ၆၀မမ ဗုံးသီး ၊ အီနာဂါ ၊ နင်းမိုင်း ၊ RPGအဖူး ၊ ကျည်ကာပြား ၊ ကျည်ဘောက်အပိုအများအပြားနဲ့ စစ်ဝတ်တန်ဆာတွေပါ သိမ်းရခဲ့ပါတယ်။
စစ်သား ၃ ဦးကိုဖမ်းပြီးနောက်ပိုင်း စစ်ကောင်စီက အောက် တိုဘာ၃၁ ရက်နေ့နေ့လယ်ပိုင်းမှာ စစ်ကြောင်းနှစ်ကြောင်းခွဲကာ ပင်တောင်ရွာကို တစ်ကြောင်းဝင်ရောက်ပြီး ဒီးဒုတ်ကွင်းရွာ ဘက်ကိုတစ်ကြောင်း ဝင်ရောက်ခဲ့တယ်လို့ သိရပါတယ်။
ဒီးဒုတ်ကွင်းရွာ အသွားလမ်းမှာ YRF တပ်ခွဲ ( ၂ ) နယ်မြေဖြစ်တဲ့အတွက်နယ်မြေရှင်းလင်းဝင်ရောက်ရင် စစ်ကောင်စီတပ်သားတွေ မိုင်းမိသေဆုံးခဲ့တယ်လို့ အသိပေးပါတယ်။
သေဆုံးစစ်ကောင်စီတပ်သားတွေထဲက တပ်သားနှစ်ဦးကို တွေ့ရှိခဲ့ပြီး ၄င်းတပ်သားတွေက ကျည်ကာအုပ်ထုပ်နဲ့ စစ်ဝတ်တန်ဆာ ၊ ခဲယမ်းအချို့ကို ထပ်သိမ်းနိုင်ခဲ့တယ်လို့ YRF က အသိပေးပါတယ်။
အခုစစ်ကြောင်းကပင်ပန်းမှုဒဏ်မခံနိုင်တာ အား အင်ချိနွဲ့လဲကျသူတွေလည်း အများအပြားရှိနေပြီး သွေးပျက်ကာ အလဲလဲအပြိုပြို နှင့် ညည်းညူနေသူများအများအပြားရှိနေတယ်လို့ YRF က ထုတ်ပြန်ထားပါတယ်။
လက်ရှိစစ်ရေးအရ ပေါက်ဆိပ်ဖြူလမ်းပိုင်းအား ရက်အကန့်အသက်မရှိပိတ်ထားတယ်လို့ကာကွယ်ရေးတပ်တွေက ထုတ်ပြန်ထားပါတယ်။
