ရွှေပြည်စိုး/People’s Spring
မိုးတွေစွေရွာနေခဲ့တဲ့ ၂၀၂၅ မေလက နေ့တစ်နေ့မှာ မြန်မာနဲ့ အိန္ဒိယနယ်စပ်က ရွာလေးတစ်ရွာထဲကနေ ပူဆွေးစွာငိုရှိုက်သံတွေလျှံထွက်လာပါတယ်။ ဒေသခံတွေ ဘယ်တော့မှ မမေ့နိုင်မယ့်အဖြစ်ဆိုးကြီးတခုက မေလ၁၆ရက်နေ့လယ်ပိုင်းက ဖြစ်ခဲ့တာပါ။
ဒေသခံပြည်သူ့ကာကွယ်ရေးတပ်ဖွဲ့ဝင်(ပကဖ)လူငယ်ဆယ်ဦး ရက်ရက်စက်စက်သတ်ဖြတ်ခံရတဲ့သတင်းကို လွန်ခဲ့တဲ့ရက်တွေကကြားထားပေမယ့် ရွာက ကလေးတွေ မဟုတ်ပါစေနဲ့လို့ဆုတောင်းရင်း အဲဒီနေ့မှာ တရွာလုံးကစောင့်ဆိုင်းနေကြတာပါ။ဒါပေမယ့် သူတို့ မျှော်လင့်သလိုဖြစ်မလာခဲ့ပါဘူး။မျှော်နေတဲ့သတင်းကောင်းအစားမိုးထဲလေထဲမှာ အသက်မဲ့နေတဲ့ခန္ဓာကိုယ်တွေသာ သူတို့ရွာလေးဆီကိုရောက်လာခဲ့ပါတယ်။တစ်ရွာလုံး တောက်တခေါက်ခေါက်နဲ့ နာကျည်းကြေကွဲစွာငိုကြွေးခဲ့ကြပါတယ်။
အသတ်ခံရတဲ့လူငယ်တွေက တမူးခရိုင်ပြည်သူ့ကာကွယ်ရေးတပ်ဖွဲ့ (တမူးပကဖ) ကလူငယ်ရဲဘော်တွေဖြစ်ပါတယ်။လူငယ်ရဲဘော်တွေဟာ ပြီးခဲ့တဲ့ မေလ ၁၄ရက်နေ့က တမူးမြို့နယ်နဲ့ထိစပ်နေတဲ့မြန်မာ-အိန္ဒိယနှစ်နိုင်ငံနယ်စပ်အနီးမှာ အိန္ဒိယနိုင်ငံ၊ အာသံရိုင်ဖယ်တပ်ဖွဲ့ရဲ့ ဖမ်းဆီးသတ်ဖြတ်မှုကိုခံခဲ့ကြရတာပါ။
Public Service Announcement
အာသံတပ်ဖွဲ့က ပစ်ခတ်သတ်ဖြတ်ခံရတဲ့ ပကဖရဲဘော်တွေက အသက် ၁၈နှစ်ကနေ ၂၅ နှစ်ကြား လူငယ်တွေဖြစ်ပါတယ်။ သူတို့က စစ်အာဏာရှင်ကိုခုခံတွန်းလှန်ဖို့ နွေဦးတော်လှန်ရေးထဲကို ကျေကျေနပ်နပ်ကြီး ခြေစုံပစ်ဝင် တာဝန်ထမ်းဆောင်ခဲ့ကြသူတေ့ဖြစ်ပါတယ်။သူတို့ကရဲဘော်ကောင်းကောင်း ၊ရဲဘော်အောင်အောင်၊ ရဲဘော်စနေ၊ ရဲဘော်ခိုင်စိုး၊ရဲဘော်မိုးဆက်၊ ရဲဘော်အာနိုး၊ရဲဘော်အဲငယ်၊ရဲဘော်ကျော်ကဲ၊ ရဲဘော်အဲဆိုင်နဲ့ရဲဘော်တာတီးတို့ဖြစ်ပါတယ်။ သူတို့မြတ်နိုးတဲ့တော်လှန်ရေးအမည်တွေကို တန်ဖိုးထားပြီး ပေးအပ်တဲ့တာဝန်တွေကို တိတိပပထမ်းဆောင်ခဲ့သူတွေဖြစ်တယ်လို့ မြန်မာ-အိန္ဒိယနယ်စပ်ဒေသအခြေစိုက် ပြည်သူ့ကာကွယ်ရေးရဲဘော်တစ်ဦးကပြောပါတယ်။
မတရားသတ်ဖြတ်ခံရမှုကို ဖြေရှင်းပေးဖို့ အမျိုးသားညီညွတ်ရေးအစိုးရ(NUG)က အိန္ဒိယအစိုးရထံ တရားဝင်စာပို့ထားတယ်လို့ထုတ်ပြန်ထားပါတယ်။ဒီဖြစ်ရပ်ဆိုးဟာအခုဆိုရင်ငါးလတင်းတင်းပြည့်ခဲ့ပါပြီ။ရေထဲကိုပစ်ချလိုက်တဲ့ ကျောက်ခဲလိုပဲ အစအနပျောက်ပြီး မေ့လျော့ခံဖြစ်နေတယ်လို့ကျန်ရစ်သူမိသားစုဝင်တွေနဲ့ ဆွေမျိုးသားချင်းတွေက ယုံကြည်နေကြပါတယ်။ သေသူတွေ ပြန်ရှင်မလာနိုင်ပေမယ့် အမှန်တရား ၊တရားမျှတမှုနဲ့ ဖေးမစာနာမှုကို ကျန်ရစ်တဲ့မိသားစုဝင်တွေက မျှော်လင့်နေကြပါတယ်။
“ ဘာမှနှစ်သိမ့်စကားမရဘူးဗျာ။ပိုဝမ်းနည်းရတယ်”
သတ်ဖြတ်ခံခဲ့ရတဲ့ ကာကွယ်ရေးရဲဘော်တစ်ဦးရဲ့ ဦးလေးတော်စပ်သူက ရင်ဖွင့်တာပါ။နောက်ထပ်လူငယ်တစ်ယောက်ရဲ့ဖခင်ဟာဆိုရင် အသက် ၇၀ အရွယ်ရှိပါပြီ။ အသက်ကြီးမှအိမ်ထောင်ကျခဲ့ပြီး တစ်ဦးတည်းသော သားအပေါ် မျှော်လင့်ချက်ကြီးကြသူတွေပါ။ စစ်တပ်ကလက်နက်အားကိုးနဲ့ ရွေးကောက်ခံအစိုးရကို အနိုင်ကျင့်ပြီးအာဏာသိမ်းတဲ့အခါ စစ်အာဏာရှင်ကိုလက်နက်ကိုင်တော်လှန်ကြဖို့ အိမ်ကိုစွန့်ခွာသွားကြတဲ့ လူငယ်တွေထဲမှာ သူ့ရဲ့သားဖြစ်သူလည်း ပါသွားပါတယ်။ အသက်၁၈နှစ်အရွယ်လူငယ်ရဲ့ စိတ်အားထက်သန်မှုကို မိဘနှစ်ပါးက တားမြစ်နိုင်စွမ်းမရှိခဲ့ပါဘူး။
“ သူတို့မှာဒီသားလေးတစ်ယောက်ပဲရှိတာ။ရူးခံနေတာပဲ” လို့သေဆုံးသူလူငယ်ရဲ့ ဦးလေးကပြောပြပါတယ်။
နောက်ထပ်လူငယ်တယောက်ရဲ့မိခင်ဖြစ်သူဟာ ဆိုရင် သားစိတ်နဲ့ပဲ ကျန်းမာရေးဆိုးဝါးသွားတယ်လို့ရွာကကူညီပေးနေသူက ပြောပါတယ်။
“ သူတို့မှာ သားဖြစ်သူနဲ့ပတ်သက်ပြီး အိပ်မက်တွေအများကြီးရှိတယ်။အခုကကျတော့အကုန် ပျက်စီးသွားပြီလေ” လို့ တမူးမြို့ခံတစ်ဦးကပြောပါတယ်။
ဒီဖြစ်စဉ်ကို ဖြေရှင်းပေးဖို့ NUGက အန္ဒိယအစိုးရထံမေလလယ်မှာပဲတရားဝင်တောင်းဆိုခဲ့ပါတယ်။ တမူးခရိုင် ပြည်သူ့ကာကွယ်အဖွဲ့မှရဲဘော်တွေကို အိန္ဒိယနိုင်ငံ၊ အာသံရိုင်ဖယ်တပ်ဖွဲ့က ပစ်ခတ်သတ်ဖြတ်ခဲ့တဲ့ဖြစ်စဉ်အတွက်စစ်ဆေးမှု အစီရင်ခံစာတွေ့ ရှိချက်တွေကို အသိပေးရင်း အိန္ဒိယအစိုးရ တာဝန်ရှိသူတွေနဲ့တွေ့ဆုံပြီးအမှုမှန်ပေါ်ပေါက်စေရေး ညှိနှိုင်းဆောင်ရွက်လျှက်ရှိတယ်လို့ NUG နိုင်ငံခြားရေးဝန်ကြီးဌာနက မေလ ၁၉ရက်ညမှာ ထုတ်ပြန်ခဲ့ပါတယ်။
အိန္ဒိယနိုင်ငံအစိုးရအနေနဲ့လည်းအမှုမှန်ပေါ်ပေါက်ရေး ဆောင်ရွက်ပေးဖို့၊ အိန္ဒိယကို ဆန့်ကျင်တိုက်ခိုက်နေသူတွေမဟုတ်တာသိရှိပါလျက် ရက်စက်စွာသတ်ဖြတ်ခဲ့တဲ့အပေါ် တာဝန်ယူပြီးစုံစမ်းစစ်ဆေးအပြစ်ပေးအရေးယူဖြေရှင်းဖို့၊နစ်နာသူ မိသားစုတွေကို နစ်နာကြေးပေးဖို၊ နောင်မှာ အလားတူ ကိစ္စမျိုးမဖြစ်စေရေးအတွက် စီမံဆောင်ရွက်ပေးဖို့လည်း NUG က တောင်းဆိုခဲ့ပါတယ်။
တမူးခရိုင်ကကာကွယ်ရေးရဲဘော်တွေ သတ်ဖြတ်မခံရမီရှေ့ရက်အနည်းငယ်က မြန်မာနဲ့အိန္ဒိယနယ်စပ်အရေး ရှုပ်ထွေးမှုတချို့ရှိနေခဲ့ပါတယ်။
တမူးမြို့နယ်နဲ့ဆက်စပ်နေတဲ့နယ်စပ်ခြံစည်းရိုးကို မြန်မာ့ဘက်ခြမ်းကိုတိုးပြီး အိန္ဒိယကကာနေတာပါ။ အဲဒီလိုကာနေတာကိုရပ်တန့်ဖို့ ကာကွယ်ရေးတပ်ဖွဲ့ဝင်အချို့နဲ့ ဒေသခံပြည်သူတွေက တားဆီးခဲ့ပါတယ်။ အာဏာလုထားတဲ့စစ်တပ်က နယ်စပ်မှာကျူးကျော်ခံရတာတွေအတွက် အသံတိတ်နေချိန်မှာ ဒေသခံပြည်သူတွေနဲ့ တော်လှန်ရေးရဲဘော်တွေက တက်စွမ်းသရွေ့ နိုင်ငံနယ်နမိတ် မပါသွားအောင် ခုခံခဲ့ကြပါတယ် ။အဲဒီလို တားဆီးပြီးရက်အနည်းငယ်အကြာမှာပဲ တမူးခရိုင်ပကဖ ရဲ့ ရဲဘော်တွေကိူ အာသံတပ်က ဖမ်းဆီးသတ်ဖြတ်ခဲ့တာပါ။
ပကဖရဲဘော်တွေကယာယီစခန်းရွှေ့ပြောင်းမှုကို သတင်းကြိုတင်ပေးပို့ထားတဲ့ကြားကပဲ မဏိပူရ်ပြည်နယ်၊ ချန်ဒေခရိုင်၊အာသံရိုင်ဖယ် Assam Rifles တပ်ရင်း(၁)ကအကြောင်းပြချက်မခိုင်လုံဘဲဖမ်းဆီးခေါ်ဆောင်၊ နှိပ်စက်၊ သတ်ဖြတ်ခြင်း ခံရတာလို့ ကနဦးစစ်ဆေးမှုရလဒ်အပေါ်အခြေခံပြီး NUGက ထုတ်ပြန်ခဲ့ပါတယ်။
အိန္ဒိယဘက်ကသတင်းထုတ်ပြန်ရာမှာတော့ မေလ ၁၄ ရက်ကအိန္ဒိယ-မြန်မာနယ်စပ် ချန်ဒယ်ခရိုင်၊ ခင်ဂျွိုင်းမြို့နယ်၊ နယူးဆမ်တဲလ်ကျေးရွာအနီးမှာ အိန္ဒိယတပ်မတော်၊ အရှေ့ပိုင်းစစ်ဌာနချုပ်၊ အာသံပြည်နယ်၊အာသံရိုင်ဖယ်တပ်ဖွဲ့ကဦးဆောင်ပြီး စစ်ဆင်ရေးပြုလုပ်စဉ် လက်နက်ကိုင် တပ်ဖွဲ့ဝင် တွေနဲ့ အပြန်အလှန်ပစ်ခတ်မှုဖြစ်ပွားခဲ့ပြီး၁၀ဦးကို သုတ်သင်ရှင်းလင်းကာ လက်နက် ခုနစ်လက် သိမ်းဆည်းရရှိခဲ့တယ်လို့ Eastern Command-Indian Army က မေလ ၁၅ ရက်မှ ထုတ်ပြန်ခဲ့ပါတယ်။
မြေပြင်အခြေအနေမှာ အဲ့ဒီလို မဟုတ်ဘူးလို့ NUGက ထုတ်ပြန်ခဲ့သလို ဒေသခံတွေကလည်းလူငယ်လေးတွေဟာ ဖမ်းဆီးသတ်ဖြတ်ခံခဲ့ရတာလို့ပြောကြပါတယ်။
“ ရက်စက်တဲ့ အစုလိုက် အပြုံလိုက် သတ်ဖြတ်မှုဗျ။ တစ်ယောက်ချင်း ပစ်သတ်ခံထားရတာ” လို့ ရုပ်အလောင်းတွေကို မြင်တွေ့ခဲ့တဲ့ ကာကွယ်ရေးရဲဘော်တစ်ဦးကပြောခဲ့ပါတယ်။
မေလ၁၆ရက်နေ့က ရုပ်အလောင်းတွေပြန်လွှဲပေးစဉ်မှာလည်း ပကဖရဲဘော်တွေကအိန္ဒိယနယ်နိမိတ်အတွင်းဝင်ရောက်ပြီးစတင်တိုက်ခိုက်လို့ နှိမ်နင်းခြင်းခံရကြောင်း နဲ့ နောက်နောင်နိုင်ငံနယ်နိမိတ် ခြံစည်းရိုးခတ်မှုကိုမကန့်ကွက်ဖို့သဘောတူကြောင်း မြေပြင်ကတာဝန်ခံတွေကို ဖိအားပေးလက်မှတ်ထိုးစေပြီးမှရုပ်အလောင်းတွေလွှဲပြောင်း
ပေးခဲ့တာလို့ NUG ထုတ်ပြန်ချက်မှာ ဖော်ပြခဲ့ပါတယ်။ ရုပ်အလောင်းလွဲပြောင်းပေးတဲ့ စာရွက်မှာ ပကဖ ရဲဘော်တွေက နှစ်နိုင်ငံနယ်စပ် BP-61 အနီး အိန္ဒိယဘက်အခြမ်းကိုကျော်လာလို့တိုက်ပွဲဖြစ်ပြီး အာသန်ရိုင်ဖယ်တပ်ဖွဲ့က တဖက်သတ်ရေးသားပြီး ဖိအားပေးလက််မှတ်ထိုးခိုင်းခဲ့ဖြစ်ပါတယ်။
ဖြစ်စဉ်ဖြစ်ပွားတဲ့ရက်တွေမှာမြန်မာအိန္ဒိယနယ်စပ်ဒေသနေ ပြည်သူတွေနဲ့ ကာကွယ်ရေးရဲဘော်တွေ ဒေါသဖြစ်ခဲ့ပြီး ပြဿနာကိုအမြန်ဆုံးဖြေရှင်းပေးဖို့ လူမှုကွန်ရက်ကနေတောင်းဆိုမှုတွေရှိခဲ့ပါတယ်။
ရဲဘော်တွေရဲ့ကျန်ရစ်သူ မိသားစုဝင်တွေကလည်းအမှုမှန်ပေါ်ပေါက်ရေး ဆန္ဒထုတ်ဖော်ခဲ့ကြပါသေးတယ်။
NUGရဲ့ ထုတ်ပြန်ချက်မှာလည်းအိန္ဒိယနိုင်ငံအစိုးရအနေနဲ့ မြန်မာပြည်သူတွေရဲ့ ဆန္ဒသဘောထားကို အလေးထား ဆောင်ရွက်မယ်လို့ ယုံကြည်ကြောင်းနဲ့ အမှုမှန်ပေါ်ပေါက်အောင်ဆောင်ရွက်ပေးဖို့ မေတ္တာရပ်ခံခဲ့ပါတယ်။
အဲဒီနောက်ပိုင်းအခြေအနေတွေမှာ တမူးခရိုင်ပကဖတာဝန်ခံရဲ့ ဖြေရှင်းနေပုံတွေက ထိရောက်မှုမရှိဘူးလို့ ကျဆုံးခဲ့တဲ့ရဲဘော်တွေရဲ့မိသားစုဝင်တွေကပြောပါတယ်။တမူးခရိုင်ပကဖတာဝန်ခံကို ယုံကြည်မှုလျော့နည်းနေပါတယ်။ ဝေးလံခေါင်များဒေသမှာနေရသူတွေမို့ သူတို့အသံကို ကျယ်ကျယ်လောင်လောင်မထုတ်နိုင်ကြပါဘူး။ ကျဉ်းထဲကျပ်ထဲအခြေအနေတွေထဲကနေ သူတို့လုပ်နိုင်တာလုပ်ရင်းတရားမျှတမှုကိုရှာဖွေနေကြပါတယ်။ အမှုမှန်ဖော်ထုတ်ပေးကြဖို့နဲ့ တရားမျှတမှုဖော်ဆောင်ပေးဖို့အခွင့်အရေးရတိုင်း ဆန္ဒထုတ်ဖော်ကြပါတယ်။
အိန္ဒိယအစိုးရဆီ စာပို့ထားတဲ့နောက်ဆက်တွဲအခြေအနေနဲ့ ရဲဘော်တွေရဲ့ကျန်ရစ်တဲ့ မိသားစုဝင်တွေအတွက် ဘယ်လိုအစီအစဥ်ရှိလဲဆိုတာ မေးမြန်းဖို့ NUG က တာဝတ်ရှိသူတွေကို People’s Spring ကဆက်သွယ်ဖို့ ကြိုးစားပေမယ့် ဆက်သွယ်လို့မရသေးပါဘူး။
ဒါအပြင် တမူးခရိုင်ပကဖတာဝန်ခံရဲ့စီမံခန့်ခွဲမှုအမှားတွေကို စိစစ်အရေးယူပေးဖို့ NUG – MODရဲ့တိုင်ကြားရေးကော်မတီထံတိုင်စာပို့တိုင်ကြားထားတယ်လို့လည်းဆိုပါတယ်။ဒါ့အပြင် အမှုမှန်ပေါ်ဖို့နဲ့ တရားမျှတမှုရရှိရေးအတွက် ဖြစ်နိုင်ရင် အိန္ဒိယအစိုးရကြားအောင် နိုင်ငံတကာအဖွဲ့စည်းတွေကတဆင့် ကြိုးစားသွားမယ်လို့ တမူးမြို့ခံလူငယ်တစ်ဦးကပြောပါတယ်။
အသက်တွေရင်းထားရတဲ့တော်လှန်ရေးထဲမှာ သားဖြစ်သူတွေကိုပုံအပ်ခဲ့တာမို့ ဒီထက်ပိုပြီးတာဝန်ခံဖြေရှင်းပေးမယ့်သူတွေလိုအပ်တယ်လို့ သတ်ဖြတ်ခံရတဲ့လူငယ်တွေရဲ့ ဆွေမျိုးအသိုင်းအဝိုင်းကတောင်းဆိုပါတယ်။
“ အားမလိုအားမရဖြစ်ရတယ်ဗျာ။ကျနော်တို့ တူသားတွေတာဝန်ထမ်းဆောင်နေတဲ့အချိန်မှာ တော်လှန်ရေးကြီးအောင်မြင်စေချင်ခဲ့တာ။အခုကြတော့ဗျာ” လို့ သေဆုံးသွားတဲ့ ရဲဘော်တစ်ဦးရဲ့ မိသားစုဝင်တစ်ဦးက ပြောရင်း အသံတိမ်ဝင်သွားပါတယ်။
ဒေသတွင်းမှာ တော်လှန်ရေးကိုဦးဆောင်နေသူတွေကိုယုံကြည်ပြီးအပ်နှံပေးခဲ့တာဖြစ်တာကြောင့် အခုလို တရားလက်လွတ်သတ်ဖြတ်ခံရတဲ့အပေါ် လုံလောက်တဲ့ဖြေရှင်းချက် နဲ့ တရားမျှတမှုရချင်တယ်လို့လည်း ရဲဘော်တွေရဲ့ဆွေမျိုးသားချင်းတွေကပြောပါတယ်။
မြန်မာနဲ့အိန္ဒိယနယ်စပ်ကရွာလေးမှာပြီးခဲ့တဲ့ မေလကလို မိုးတွေမသည်းတော့ပေမယ့် ဒီရက်ထဲ ဆောင်းမိုးတွေ တဖွဲဖွဲကျနေပါတယ်။အာသံတပ်က သတ်ဖြတ်ခြင်းခံလိုက်ရတဲ့ တမူးခရိုင် ပြည်သူ့ကာကွယ်ရေးတပ်ဖွဲ့က ရဲဘော်ဆယ်ဦးရဲ့ မိသားစုဝင်တွေရင်ထဲမှာတော့ မိုးပြိုသလို ပူလောင်နေဆဲဖြစ်ပါတယ်။ သူတို့ယုံကြည်တဲ့အမှန်တရားတစ်ခုကိုမျှော်လင့်တကြီးစောင့်ဆိုင်းနေကြပါတယ်။ ။
