မတ်-၂၃၊၂၀၂၆။ရောင်နီ/People’s Spring
စစ်ကောင်စီက ရက် ၅၀ စာစက်သုံးဆီရှိတယ် ဆိုပေမယ့်ရန်ကုန်မြို့က စက်သုံးဆီအရောင်းဆိုင်အချို့ဟာ ဆီကုန်နေလို့ ဓာတ်ဆီ 92 နဲ့ 95 တွေကို အရောင်းရပ်ထားပြီး မတ် ၂၆ ရက်မှ ပြန်ရမယ်လို့ ကြေညာထားပါတယ်။
တာမွေမြို့နယ်က Regency ဆီဆိုင်မှာ 92 နဲ့ 95 အမျိုးအစားတွေကို မတ် ၂၂ ရက် နေ့လည်အထိရောင်းပေးခဲ့ပြီး သီလဝါဆိပ်ကပ် Terminal ကနေ ထပ်ထုတ်နေရတာကြောင့် မတ် ၂၆ ရက် ညနေ ၄ နာရီမှပြန်ရောင်းပေးနိုင်မယ်လို့ ကြေညာထားပါတယ်။
ဆီဆိုင်အများစုမှာလည်း တချို့နေရာတွေက 92 ပဲရသလို တချို့ဆိုင်တွေက 95 ပဲရတယ်လို့ ယာဉ်ပိုင်ရှင်တွေက လူမှုကွန်ရက်ကနေ အချင်းချင်း မျှဝေထားကြပါတယ်။
Public Service Announcement
စစ်ကောင်စီက စက်သုံးဆီဈေးနှုန်းတွေကို သောကြာနေ့တိုင်းမှာ အပြောင်းအလဲ ပြုလုပ်လေ့ရှိတာကြောင့် စက်သုံးဆီဆိုင်တွေဘက်က ဈေးအတတ်ကို စောင့်ရောင်းတာလည်း ဖြစ်နိုင်တယ်လို့ ယာဉ်ပိုင်ရှင်အချို့က သုံးသပ်ထားပါတယ်။
ပြည်တွင်းစက်သုံးဆီစျေးက သမိုင်းတလျှောက် အမြင့်ဆုံးဖြစ်နေပြီး လက်ရှိရန်ကုန်ဈေးကွက်မှာ ဓာတ်ဆီ92တစ်လီတာက ၃,၆၁၀ကျပ် ၊ ဓာတ်ဆီ 95 တစ်လီတာ ၃,၈၅၀ကျပ်၊ ဒီဇယ်ဆီ တစ်လီတာ ၄,၃၉၀ကျပ်နဲ့ ပရီမီယံဒီဇယ် ၄,၈၂၀ကျပ်နဲ့ရောင်းချနေတာပါ။
လက်ရှိမှာ ကားတွေအနေနဲ့ စက်သုံးဆီကို ရက်အလိုက် စုံ ၊ မ ခွဲပြီး ဝယ်ယူနေရတာပါ။ဒါ့အပြင် စစ်ကောင်စီဘက်က စက်သုံးဆီဝယ်ယူရာမှာ ပိုအဆင်ပြေစေဖို့ဆိုတဲ့အကြောင်းပြချက်နဲ့ ယာဥ်ရဲ့စက်စွမ်းအား(အင်ဂျင်ပါဝါ)ပေါ်မူတည်ကာ တစ်ပတ်အတွင်းဝယ်ယူခွင့်ရှိတဲ့ ပမာဏကို သတ်မှတ်ပြီး တစ်ပတ်အတွင်းတစ်ကြိမ်တည်းဖြစ်စေ အများဆုံးနှစ်ကြိမ်ဖြစ်စေ ဝယ်ယူနိုင်မယ့်စနစ်ကို Wheel Tax(ယာဥ်သက်သေခံလက်မှတ်)ရဲ့ Bar code နဲ့ QR code စနစ်ထဲထည့်သွင်းမယ့် အစီအစဥ်သစ်ကိုလာမယ့် ရက်သတ္တပတ်စမယ်လို့ မတ် ၂၂ ရက်မှာထုတ်ပြန်ထားဝာာပါ။
စစ်ကောင်စီက အရှေ့အလယ်ပိုင်းတိုက်ပွဲတွေကြောင့် ဝယ်ယူဖို့ ခက်ခဲနေတဲ့ စက်သုံးဆီနဲ့ ပတ်သက်ပြီး စည်းမျဉ်းတွေ ခဏခဏထုတ်ပြန်နေတာလည်းဖြစ်ပါတယ်။
