ဂါဇာရဲ့ အကြီးဆုံး ဆေးရုံကြီးထဲမှာ ဟားမားစ်တွေ ဖမ်းဆီးသွားတဲ့ ဓားစာခံတွေ ရှိခဲ့ဖူးကြောင်း လုံခြုံရေး ကင်မရာ မှတ်တမ်း ဗီဒီယိုတွေ ရရှိထားတယ်လို့ အစ္စရေး စစ်တပ်က ပြောပါတယ်။
ဂါဇာ ကမ်းမြှောင်ဒေသမှာ အကြီးဆုံး ဆေးရုံဝင်းကြီးဖြစ်တဲ့ အယ်လ်ရှီဖာကို အစ္စရေးတပ်တွေက ပိတ်ဆို့ထားပြီး စီးနင်းရှာဖွေမှုတွေ လုပ်ဆောင်နေတဲ့အပေါ် နိုင်ငံတကာ ဝေဖန်မှုတွေ မြင့်တက်နေချိန်မှာ အစ္စရေးဖက်က အခုလို တုံ့ပြန်ခဲ့တာ ဖြစ်ပါတယ်။ အယ်လ်ရှီဖာဟာ ဂါဇာမှာ စစ်ရှောင်တွေ ခိုလှုံတဲ့ အဓိက ဒုက္ခသည် စခန်းကြီး တစ်ခုလည်းဖြစ်ပြီး အခုတော့ စခန်းထဲက ဆရာဝန်တွေရော၊ ဒုက္ခသည်တွေနဲ့ လူနာတွေပါ အားလုံးနီးပါး ရွှေ့ပြောင်း ထွက်ခွာသွားပြီးပါပြီ။
အစ္စရေးက ဆေးရုံ အဆောက်အအုံတွေ မြေအောက်ထဲမှာ ဟားမားစ်တွေရဲ့ လျှို့ဝှက် အခြေစိုက် စခန်းတွေ ရှိနေကြောင်း စွပ်စွဲပြီး အယ်လ်ရှီဖာကို စီးနင်းခဲ့ပေမယ့် ထိရောက်တဲ့ အထောက်အထား မပြနိုင်ကြောင်း ဝေဖန် ခံနေရချိန်မှာ အခု လုံခြုံရေး ကင်မရာ မှတ်တမ်းကို ထုတ်ပြလာခဲ့တာပါ။
အောက်တိုဘာ ၇ ရက်တုန်းက အစ္စရေးကို ဟားမားစ်တွေ ကျူးကျော်တဲ့နေ့ မနက်ပိုင်းက ရိုက်ကူးထားတဲ့ မှတ်တမ်း ဗီဒီယိုမှာတော့ ဟားမားစ်တွေက ဖမ်းဆီးသွားတဲ့ ဓားစာခံတွေကို ဆေးရုံထဲကနေ ဖြတ်သန်း ခေါ်ဆောင်နေတာကို တွေ့ခဲ့ရပါတယ်။ အဲဒီ ဓားစာခံတွေထဲက အစ္စရေး စစ်သမီးတစ်ယောက်ဟာ ဆေးရုံထဲမှာတင် ပစ်သတ် ခံခဲ့ရတယ်လို့လည်း အစ္စရေး စစ်တပ်က စွပ်စွဲခဲ့ပါတယ်။
အစ္စရေး လေတပ်ရဲ့ ဗုံးကြဲ တိုက်ခိုက်မှုကြောင့် ဟားမားစ်တွေ အသုံးပြုတဲ့ မြေအောက်ခန်းမှာ ချုပ်နှောင် ခံထားခဲ့ရတဲ့ တပ်ကြပ် နိုအာ မာစီယာနိုဟာ ဒဏ်ရာ အနည်းအကျဉ်း ရသွားခဲ့ကြောင်း၊ သူ့ကို ထိန်းသိမ်းထားတဲ့ ဟားမားစ် တပ်သားက မာစီယာနိုကို ဆေးရုံ တင်ပို့ခဲ့ပေမယ့် တခြားဟားမားစ် တစ်ယောက်က အစ္စရေး စစ်သမီးကို ပစ်သတ်ခဲ့ကြောင်း အစ္စရေးက ထုတ်ပြန်ပါတယ်။ ဟားမားစ်တွေကတော့ မာစီယာနိုဟာ အစ္စရေး လေကြောင်းတိုက်ခိုက်မှုမှာ ကတည်းက သေဆုံးသွားတာလို့ ပြောကြားပြီး ဓားစာခံကို သတ်ပစ်တယ်ဆိုတဲ့ စွပ်စွဲချက်ကို ငြင်းဆိုထားပါတယ်။ နောက်ပြီး အယ်လ်ရှီဖာ ဆေးရုံမှာ စစ်ရေး ကွပ်ကဲမှုဌာန ဖွင့်လှစ်ထားခဲ့တယ် ဆိုတာကိုလည်း ဟားမားစ်တွေဖက်က ပယ်ချထားပါတယ်။
Public Service Announcement
အစ္စရေး စစ်တပ်က တင်ပြတဲ့ ဗီဒီယိုထဲမှာတော့ လက်နက်ကိုင်တွေဟာ ဓားစာခံ နှစ်ယောက်ကို တွန်းတိုး ခေါ်ယူရင်း ဆေးရုံထဲက ဖြတ်သန်းသွားတာကို တွေ့ရပါတယ်။ ဓားစာခံ တစ်ဦးက ဖီဆန်လိုတဲ့ အရိပ်လက္ခဏာတွေ ပြသနေပြီး နောက်တစ်ယောက်ကတော့ ချိုင်းထောက်နဲ့ လမ်းလျှောက်နေရပါတယ်။
လတ်တလောမှာတော့ အစ္စရေး စစ်တပ်ဟာ ဟားမားစ်တွေ ရှိနေတယ်ဆိုတဲ့ စွပ်စွဲချက်နဲ့ စီးနင်းခဲ့တဲ့ အယ်လ်ရှီဖာ ဆေးရုံထဲမှာ တကယ်ပဲ ပါလက်စတိုင်း ပြောက်ကျားတွေ အခြေချခဲ့တယ်ဆိုတဲ့ ခိုင်ခိုင်မာမာ အထောက်အထားတွေ တင်ပြဖို့ ပြင်းထန်တဲ့ ဖိအားတွေနဲ့ ကြုံတွေ့နေရပါတယ်။
