လွန်ခဲ့သောတစ်ပတ်က တိုက်လေယာဉ်ဖြင့် ဗုံးကြဲသည့်အပြင် ရဟတ်ယာဉ်ဖြင့် ပစ်ခတ်၍ ကလေးငယ်များ အပါအဝင် လူပေါင်း ၁၆၀ ကျော် သေဆုံးခဲ့ရသည့် စစ်ကိုင်းတိုင်း၊ ကန့်ဘလူမြို့နယ် ပဇီကြီးရွာကို စစ်ကောင်စီ ခြေလျင်တပ် ယနေ့ (ဧပြီ ၁၉) ဝင်ရောက်လာသည်။
အင်အား ၁၀၀ ကျော်ပါသည့် ထိုစစ်ကြောင်းမှာ ယမန်နေ့ ညနေပိုင်းတွင် မန္တလေးတိုင်း သပိတ်ကျင်းမြို့နယ်အတွင်းမှ ဧရာဝတီမြစ်ကို ဖြတ်ကူးကာ အနောက်ဘက်ကမ်းရှိ မလယ်ရွာသို့ ရောက်လာသည်ဟု ဒေသတွင်း သတင်းရင်းမြစ်သုံးဦးထံမှ သိရသည်။
ထိုတပ်ဖွဲ့မှာ မလယ်ရွာအနောက်ဘက် လေးမိုင်အကွာ ပဇီကြီးရွာသို့ ယနေ့မွန်းလွဲပိုင်းတွင် ရောက်လာသည်ဟု အမျိုးသားညီညွတ်ရေးအစိုးရ (NUG) ၏ ကန့်ဘလူခရိုင်ပြည်သူ့ကာကွယ်ရေးတပ်ဖွဲ့ (PDF) တပ်ရင်း (၄) တာဝန်ရှိသူ အမျိုးသားတစ်ဦးက ပြောသည်။
တော်လှန်ရေးအဖွဲ့များက ပဇီကြီး၊ မလယ်နှင့် ရွာနီးချုပ်စပ်ရှိ ဒေသခံများကို ဘေးလွတ်ရာ ရွှေ့ပေးနေရသဖြင့် စစ်ကောင်စီတပ်ဖွဲ့နှင့် တိုက်ပွဲဖြစ်ပွားမှုမရှိကြောင်း ၎င်းက ဆက်ပြောသည်။ “စစ်ရှောင်တွေကို ကျွန်တော်တို့ ဆွဲထုတ်နေကြတယ်။ ရွာ (တွေ) ထဲက အခြေအနေတော့ ဘာမှ မသိရသေးဘူး”။
ပဇီကြီးကို ဦးတည်ကာ အနောက်ဘက် မိုင် ၄၀ ကျော်အကွာ ကန့်ဘလူမြို့ပေါ်မှ နောက်ထပ် စစ်ကြောင်းတစ်ကြောင်း လာရောက်နေကြောင်း၊ ထိုစစ်ကြောင်းမှာ ပဇီကြီးနှင့် ၁၀ မိုင်ခန့်အကွာ ရွှေဘို-မြစ်ကြီးနား ကားလမ်းပေါ်တွင်သာ ရှိသေးကြောင်း ကန်ဘလူမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူတစ်ဦးကလည်း ပြောသည်။
ဗုံကြဲတိုက်ခိုက်ခံရပြီးနောက်ပိုင်း လူဦးရေ ၈၀၀ ခန့်ရှိ ပဇီကြီးရွာခံတို့မှာ တစ်စတစ်စဖြင့် ရွာကို စွန့်ခွာထွက်ပြေးနေကြရသည်။ စစ်ကောင်စီ ခြေလျင်စစ်ကြောင်း ဝင်လာ၍ ပဇီကြီးနှင့် ပတ်ဝန်းကျင်ရွာများမှ ဒေသခံ မည်မျှ တိမ်းရှောင်နေရသည်၊ ဖမ်းဆီးခံရသူ၊ သေဆုံးသူ ရှိမရှိ အသေးစိတ်တို့ကို မသိရသေးပေ။
“ကျွန်တော်တို့က တောင်သူတွေဆိုတော့ ရွာပြန်ပြီး နွားတွေ ဘာတွေ ကြည့်ရတာပေါ့။ ကျန်တဲ့သူတွေတော့ တောစပ် အကုန်ပို့ထားရတယ်။ ကျွန်တော်တို့ရွာတွေရော၊ ရွာနားနီးတာကတော့ အကုန်ရှောင်ရတယ်။ ခုကတော့ (စစ်ကြောင်း) ဝင်တာပဲ သတင်းရသေးတယ်” ဟု ပဇီကြီးရွာနီးစပ်ချုပ်တွင် နေထိုင်သည့် အမျိုးသားတစ်ဦးက ပြောသည်။
တော်လှန်ရေးအဖွဲ့ ရုံးဖွင့်ပွဲ ပြုလုပ်နေသည့် ပဇီကြီးရွာကို ဧပြီ ၁၁ နံနက်ပိုင်းတွင် စစ်ကောင်စီက တိုက်ခိုက်ခဲ့ခြင်းဖြစ်သည်။ အကျွေးအမွေးဖြင့် ဧည့်ခံသဖြင့် ကလေးများအပါအဝင် ဒေသခံ ၂၀၀ ကျော် စုဝေးကြစဉ် တိုက်လေယဉ်ဖြင့် ဗုံးနှစ်လုံးကြဲချ၊ ထွက်ပြေးပုန်းရှောင်သူများကို ရဟတ်ယာဉ်ပေါ်မှ ဖျက်အားပြင်းသေနတ်များသုံး၍ ပစ်ခတ်ခဲ့သည်။
လေကြောင်းတိုက်ခိုက်မှုအတွင်း ထိခိုက်ဒဏ်ရာရသူ၊ အလောင်းကောက်သူများကို စစ်ကောင်စီတပ်က လေကြောင်းမှ ထပ်မံတိုက်ခိုက်သဖြင့် မီးကျွမ်းနေသည့် အလောင်းများ၊ အပိုင်းပိုင်းပြတ်နေသည့် ခန္ဓာကိုယ်အပိုင်းအစများကို ဒေသခံများ လေးရက်နီးပါး စုစည်းကောက်ယူခဲ့ရသည်။
ထိုဖြစ်စဉ်အတွင်း ၆ လသား မိန်းကလေးတစ်ဦးအပါဝင် ကလေးသူငယ် ၄၀ ဦး၊ အသက် ၁၈ နှစ်နှင့်အထက် ပြည်သူ ၁၂၈ ဦး သေဆုံးခဲ့သည်ဟု အမျိုးသားညီညွှတ်ရေးအစိုးရ (NUG) က ဧပြီ ၁၆ တွင် သတင်းထုတ်ပြန်သည်။ အရိုးကြေ၊ အသားပြတ်ထွက်သည်အထိ ဒဏ်ရာပြင်းထန်သူ ၅၀ နီးပါးရှိသည်ဟု သိရသော်လည်း အသေးစိတ်အခြေအနေကို မသိရသေးပေ။
ပဇီကြီးရွာကို လေကြောင်းမှ တိုက်ခိုက်သည်ဟု စစ်ကောင်စီကလည်း ဝန်ခံထားသည်။ ပဇီကြီးရွာကို အခြေပြု၍ တော်လှန်ရေးလုပ်ဆောင်မှုများကို ရှင်းလင်းမည်ဟုလည်း စစ်ကောင်စီ၏ ဧပြီ ၁၁ ရက် ထုတ်ပြန်ချက်က ဆိုထားသည်။
