اطلاعات روز: د طالبانو د کورنیو چارو وزارت ویاند عبدالمتین قانع وايي، چې د کابل ارغندي سیمه کې د یوه مسافر وړونکي بس د چپه کېدو له کبله ۲۵ کسان مړه او ۲۷ نور ټپیان شوي دي.
دا پېښه نن سهار (چهارشنبه، ۵ د وږي) د کابل-کندهار پر لویه لار د پغمان په ارغندې سیمه کې رامنځته شوې.
قانع ویلي، چې یو ۵۸۰ ډوله مسافر وړونکی بس په ارغندې چوک کې له عمومي سړک څخه وتلی او چپه شوی دی.
د سرچینو په وینا، دغه بس له هرات څخه کابل ته روان و.
د طالبانو د کورنیو چارو وزارت ویاند د پېښې لامل د موټر چلوونکي بې احتیاطي بللې. هغه په بس کې د مسافرو په اړه بشپړ جزیات نه دي په ډاګه کړي.
دا په داسې حال کې ده، چې یوه اونۍ وړاندې په هرات کې د ایران څخه راستنېدونکو کډوالو د بس د ټکر له امله شاوخوا ۸۰ تنه مړه شول.
په هیواد کې د ترافیکي پیښو نور مهم عوامل ډیر سرعت او غیر معیاري سړکونه بلل کېږي.
هیواد کې ډیری پیښې د کوچني ګړندي موټرو د ټکر یا چپه کېدو له امله رامنځته کېږي؛ خو د مسافر وړونکو بسونو پېښې بیا درانه تلفات له ځان سره لري.