اطلاعات روز: ننګرهار کې د طالبانو سیمه ییز چارواکي وایي، چې د دغه ولایت په سپین غر، اچین، روداتو، هسکې مېنې، پچیراګام او چپرهار ولسوالیو کې د سختو ورښتونو له کبله سېلابونه راوتلي چې له امله یې خلکو ته درانه مالي او ځاني زیانونه اوښتي دي.
د دغه ولایت د اطلاعاتو او کلتور ریاست لپاره د طالبانو د اطلاعاتو امر قریشي بدلون وایي، چې د ننګرهار په بېلابېلو سیمو کې د تېرې شپې او نن سهار (شنبه، ۸ د وږي) د سختو سېلابونو له امله پنځه کسان مړه او ۱۵ نور ټپیان شوي دي.
د هغه په خبره د سپين غر ولسوالۍ اړوند «بټن» کلي کې د ورښتونو له امله د داد الله په نامه د یو ځایي اوسېدونکي د کور چت غورځېدلی، چې پر مهال د نوموړي دوه لورګانې مړې شوي او د کورنۍ درې نور غړي یې ټپیان شوي دي.
د نوموړي په وینا همدا راز په روداتو، اچین او چپرهار ولسوالیو کې د سېلابونو پر مهال درېیو تنو خپل ژوند له لاسه ورکړی او ۱۲ نور ټپیان شوي دي.
هغه زیاتوي، چې دغه راز شپږ کسان د ولسي خلکو په مرسته له سېلابونو ژغورل شوي او ځېنې تري تم دي، چې کره ارقام یې نه لري.
د ده په وینا، چې د یاد سېلابونو پر مهال د تورخم – جلال اباد لویه لاره د هر ډول تګ راتګ پرمخ تړل شوې او دغه راز په زرګونه جریبه کرنېزه ځمکه سېلابونو له منځه وړې او په سلګونه کورنه یې ویجاړ کړي دي.
بلخوا د ننګرهار د کرنې ریاست هم منلې چې د دغه ولایت په بېلابېلو سیمو کې د وروستیو سېلابونو له امله کرنه سخته زیانمنه شوې، چې ناوړه پایلې به ولري.
په ورته وخت کې د سېلاب له امله زیانمن شوي خلک له حکومت او مرستهرسوونکو موسېسو د مرستې غوښتنه کوي او په وینا یې، که بېړنۍ مرستې ونه رسېږي، خلک به له ستونزو سره مخ شي.
په اقغانستان کې اقلیمي بدلون، د سیندونو غاړو ته د استنادي دیوالونو نشتون، د اړوندو ادارو له لوري له وړاندې د خبرتیاوو نهورکول او د هستوګنیزو کورونو د جوړولو پر مهال د سېلابونو د خطراتو لهمنځه وړلو ته نه پاملرنه هغه عوامل بلل کېږي چې د کمو وروښتونو او سېلابونو پر مهال هم خلکو ته درانه زیانونه اړوي.