اطلاعات روز: د کډوالو په چارو کې د ملګرو ملتونو عالي کمیسارۍ ویلي چې د افغانستان په ختیځ کې له زلزلې پاتې شویو یوه شپه په پرانیستې فضا کې تېره کړه.
دې دفتر نن (سېشنبه، ۱۱ د وږي) پر ایکس ليکلي: «د فاجعې ابعاد د مرستې رسونې لپاره د چارواکو او ځایي ټولنو تر ظرفیت ډېر لوړ دي.»
د ملګرو ملتونو عالي کمیسارۍ د مرستې غوښتنه کړې او ویلي یې دې چې «د افغانانو ملاتړ ته اړتیا ده».
په افغانستان کې د ملګرو ملتونو مرستندوی پلاوي (یوناما) هم ویلي چې زلزله ځپلو ته د مرستې رسونې لپاره بېړنۍ مرستې ته اړتیا ده.
د یکشنبې په ورځ د افغانستان ختیځ زلزلې ولړزاوه.
دې پېښې یوازې په کونړ کې تر یو زر او ۴۰۰ زیات کسان ووژل.
تر ټولو زیات زیانونه د کونړ په نورګل ولسوالۍ کې اوښتي او ویل کېږي چې هلته څو کلي په بشپړه توګه ویجاړ شوي دي.
د ژغورنې عملیات او مرستې رسونې د خرابو لارو له امله له ننګونو سره مخ دي. طالبانو هم پرون اعلان کړی و چې ځینو سیمو ته یوازې د الوتکو له لارې لاسرسی کېدلای شي.