اطلاعات روز: د اروپايي پارلمان غړې هانا نیومن ویلي، چې د طالبانو جزایي اصول نامه «جنسیتي اپارتاید او د ښځو او نجونو بالفعل غلامۍ رامنځته کوي».
نوموړې ایکس کې پر خپله پاڼه په یوه پیغام کې لیکلي: «طالبانو په افغانستان کې نوی جزایي قانون جوړ کړی. په حقیقت کې دا قانون جنسیتي اپارتاید او د ښځو او نجونو پر وړاندې بالفعل غلامۍ رامنځته کوي.»
هانا نیومن زیاته کړې، چې طالبان د خپلو جنایاتو اړوند ځواب ورکولو په تړاو ناوخته شوې.
هغې ټینګار کړی، چې طالبان به هیڅ کله عادي نه شي.
د طالبانو مشر په دې وروستیو کې د دې ډلې «د محاکمو جزايي اصولنامه» توشیح کړې او د عملي کیدو اعلان یې کړی دی.
د دې اصولنامې تصویب پراخ غبرګونونه راپارولي او بېلابېلو سیاسي بهیرونو یې پایلې د اندېښنې وړ بللې دي.
د روادارۍ په نوم د بشري حقونو بنسټ ویلي، چې په دې اصولنامه کې طالبانو د حنفي مذهب له پیروانو پرته د اسلامي مذاهبو نور پیروان «بدعتيان» بللي او ټولنیز طبقهبندي او غلامي یې مشروع ګرځولې ده.
د رواداري د اعلامیې له مخې، په دې اصولنامه کې د ښځو او ماشومانو پر وړاندې تاوتریخوالی یوازې په سخت فزیکي تاوتریخوالي پورې محدود بلل شوی او رواني او جنسي تاوتریخوالی پکې منع شوی نه دی.
په ورته مهال بیا د طالبانو عدلیې وزارت د دې ډلې د جزايي اصولنامې پر وړاندې د نیوکو په غبرګون کې ویلي، چې د طالبانو پر قوانینو اعتراض کول له شرعي پلوه جرم دی او معترض کسان به تر قانوني تعقیب لاندې ونیول شي.
دې وزارت ویلي، چې د طالبانو تقنیني اسناد له قرآن، سنت او «حنفي فقهې مستندو کتابونو» پر بنسټ تدوین او تصویب شوي دي.
دوی زیاته کړې، چې د دوی پر قوانینو اعتراض «شرعي او علمي بنسټ نه لري بلکې د جهل او یا هم د تجاهل له مخې ترسره کېږي او شرعاً جرم دی او پر دغو قوانینو اعتراض کوونکي کسان به د قانوني تعقیب لپاره عدلي او قضايي ارګانونو ته معرفي شي».
