د الجزیرې شبکې راپور ورکړی چې حوثیانو د سره سمندر پر غاړه د یمن ټوله ساحلي کرښه نیولې او ځانونه یې ستراتیژیک بابالمندب تنګي ته رسولي دي.
الجزیرې نن (جمعه، د وږي ۲۰مه) په یوه راپور کې لیکلي چې سعودي عربستان هم د حوثیانو پر وړاندې اقدام کړی، خو حوثیان د یمن د جنوب پر لور خپلو پرمختګونو ته دوام ورکوي.
الجزیرې لیکلي چې د سعودي عربستان هوايي ځواکونو د مخا پر هوايي ډګر دوه هوايي بریدونه کړي دي.
حوثیانو پرون د مخا بندري ښار کنټرول، چې د سعودي عربستان په ملاتړ د یمن د رسمي حکومت په لاس کې و، ترلاسه کړ.
د دې رسنۍ د راپور له مخې، د یمن رسمي حکومت چې د سعودي عربستان ملاتړ ورسره دی، د شاتګ په حال کې دی او حوثیانو د سره سمندر پر غاړه د یمن وروستۍ ساحلي سیمې هم نیولې دي.
د الجزیرې خبریال له سیمې څخه راپور ورکړی چې د یمن د رسمي حکومت د ځواکونو له مخا څخه تر وتلو وروسته، حوثیان د جنوب پر لور د پرمختګ پر مهال له لږ مقاومت سره مخ شول.
هغوی ذباب او وروسته مراد هم ونیول، چې د یمن وروستی ساحلي ښار بلل شوی، او په دې سره یې پر ټوله ساحلي کرښه خپل کنټرول بشپړ کړ.
اوس د حوثیانو سمندري ځواکونو د ساحل پر لور د پرمختګ په ترڅ کې د بابالمندب په تنګي کې د میون ټاپو نیولی او له جګړې وروسته یې د زقر ټاپو پر لور هم خپله لار پرانیستې ده. په دغه ټاپو کې لا هم جګړه روانه ده.
حوثیانو په ورته وخت کې، په هغو سیمو کې چې د یمن رسمي حکومت د کلونو لپاره تر خپل کنټرول لاندې ساتلې وې، له حکومتي ځواکونو غوښتي چې خپلې وسلې پر ځمکه کېږدي، څو خوندي پاتې شي.
مهدي المشاط، د حوثیانو د عالي سیاسي شورا مشر، په یوه اعلامیه کې له یمني حکومتي ځواکونو غوښتي چې خپلې وسلې پر ځمکه کېږدي، څو د قانوني تعقیب پر وړاندې له بشپړ خوندیتوب څخه برخمن شي.
الجزیرې لیکلي چې د حوثیانو دغه دریځ او له ښارونو څخه د حکومتي ځواکونو پرلهپسې شاتګ ښيي چې په رښتیا د وضعیت کنټرول د چا په لاس کې دی.
تر اوسه داسې هېڅ راپور نه دی خپور شوی چې وښيي د یمن حکومتي ځواکونو د حوثیانو د بېرته شړلو لپاره، له هغو سیمو څخه چې حوثیانو نیولې دي، کوم پراخ پوځي ځوابي برید پیل کړی وي.
امریکايي شبکې آکسیوس نن سهار په یوه راپور کې لیکلي چې د امریکا ولسمشر ډونالډ ټرمپ د سعودي عربستان د ولیعهد محمد بن سلمان هغه غوښتنه رد کړې چې پر یمني حوثیانو دې برید وشي.
