د طالبانو د دفاع وزارت وایي، د دې ډلې د «۲۰۹ الفتح قول اردو» یوه پلاوي او د ترکمنستان سرحدي چارواکو د سرحدي امنیت په اړه خبرې کړې دي.
د طالبانو دفاع وزارت نن (جمعه، د وږي ۲۰مه) په یوه خبرپاڼه کې ویلي چې دواړو لورو ژمنه کړې چې د امنیت د پیاوړتیا لپاره به خپلمنځي همغږي لا زیاته کړي.
په دغو خبرو کې د طالبانو د ۲۰۹ الفتح قول اردو د ۱۱م سرحدي لوا قوماندان عبدالواسع نظري او د ترکمنستان د سرحدي لوا قوماندان مخدومقلي بردییف د دواړو پلاوو مشري کوله.
د طالبانو دفاع وزارت ویلي چې دواړو لورو د «سرحدي سیمو د امنیت او د پولې دواړو غاړو ته د سرحدي ځواکونو ترمنځ د همغږۍ د لوړولو» په اړه خبرې کړې او ژمنه یې کړې چې د امنیت د لا پیاوړتیا لپاره به خپلې ټولې هڅې وکړي.
طالبانو په تېرو پنځو کلونو کې، له چین پرته، له نږدې ټولو ګاونډیو هېوادونو سره په بېلابېلو مواردو کې سرحدي ستونزې لرلې دي. له پاکستان سره د مستقیمو پوځي نښتو سربېره، د طالبانو او ګاونډیو هېوادونو ترمنځ تر ټولو مهمې سرحدي ستونزې ناقانونه کډوالي او د نشهیي توکو قاچاق دي.
همدارنګه په ځینو مواردو کې د افغانستان له خاورې څخه د تاجکستان، ترکمنستان او ازبکستان پر لور ډزې شوې دي او لږ تر لږه په دوو مواردو کې طالبان له ایراني سرحدي ځواکونو سره په مستقیمه توګه نښتې شوي دي.
له بلې خوا، د افغانستان شمالي ګاونډي هېوادونه د هغو «ترهګرو ډلو» د غړو د نفوذ په اړه اندېښمن دي چې ویل کېږي د طالبانو له بیا واکمنېدو وروسته د افغانستان په خاوره کې ځای پر ځای شوي او غواړي منځنۍ اسیا ته داخل شي.
