په پنجشېر کې سیمهییزې سرچینې وايي، طالبانو په دغه ولایت کې د شاوخوا ۵۰۰ دیني عالمانو په ګډون د خپل حکومت په ملاتړ غونډه کړې ده.
د سرچینو په وینا، دغه غونډه نن (سهشنبه، ۱۴ د میزان) په پنجشېر کې د طالبانو د «ځانګړې لوا» له لوري د دغه ډلې د والي له دفتر سره په همغږۍ جوړه شوې وه.
سرچینې وايي، په دې غونډه کې د طالبانو د پنجشېر والي محمدآغا حکیم او د دې ډلې یو شمېر پلوي دیني عالمانو خبرې وکړې او له دیني عالمانو یې وغوښتل چې د طالبانو له حکومت څخه ملاتړ وکړي او له خلکو هم وغواړي چې له دغه نظام څخه ملاتړ وکړي.
د سرچینو د معلوماتو له مخې، د طالبانو والي ویلي چې په تېرو حکومتونو کې د بهرنیو هېوادونو افکار او کلتور په افغانستان کې ترویج شوي، چې د نوموړي په وینا، د «اسلامي امارت» او خلکو ترمنځ یې واټن رامنځته کړی دی. هغه ویلي چې اوس د دیني عالمانو دنده ده چې د خلکو افکار اصلاح کړي.
د سرچینو په وینا، د کابل د پلخشتي جومات خطیب مولوي نقیبالله هم په دې غونډه کې ګډون کړی و او له نورو دیني عالمانو یې وغوښتل چې د طالبانو د نظام په ملاتړ خپل غږ پورته کړي.
د سرچینو د راپور له مخې، په دې غونډه کې ګډون کوونکي دیني عالمان د پنجشېر د طالبانو ولسوالانو له لوري غونډې ته راوستل شوي وو.
دا په داسې حال کې ده چې د طالبانو چارواکي د دغه ډلې پر حکومت د نارضایتۍ د زیاتېدو له امله هڅه کوي چې وضعیت تر خپل کنټرول لاندې وساتي.
طالبانو تر دې وړاندې هم څو ځله له دیني عالمانو، قومي مشرانو او سیمهییزو مخورو غوښتي چې خلک د دوی د حکومت ملاتړ ته وهڅوي.
