په ملګرو ملتونو کې د افغانستان دایمي استازولۍ سرپرست نصیر احمد فایق وايي، ترهګري په ټولو بڼو کې د غندنې وړ ده او باید د «ښه» او «بد» ترهګرو ترمنځ هېڅ ډول توپیر ونه شي.
فایق د ملګرو ملتونو د عمومي اسامبلې د شپږمې کمېټې په غونډه کې، چې د «نړیوالې ترهګرۍ د له منځه وړلو لپاره د اقداماتو» په اړه جوړه شوې وه، وویل چې د افغانستان خلکو له ترهګرۍ او د نیابتي ځواکونو په توګه د افراطي ډلو له کارولو څخه ډېرې ژورې کړاوونه ګاللي دي.
هغه زیاته کړه: «موږ ترهګري، هر چېرې او د هر چا له لوري چې ترسره کېږي، په کلکه غندو. هېڅ سیاسي موخه، ایډیالوژیکه ادعا او یا مذهبي توجیه نشي کولای ترهګریز تاوتریخوالی توجیه کړي.»
فایق ټینګار وکړ چې د «ښه» او «بد» ترهګرو ترمنځ باید هېڅ ډول توپیر ونه شي.
په هغه وینا کې چې فایق په دې غونډه کې وړاندې کړه، راغلي چې د طالبانو له واک ته رسېدو او د یوه مشروع حکومت د نشتوالي په شرایطو کې «افراطیت او ترهګري» د افغانستان او سیمې لپاره جدي ګواښونه دي.
د نوموړي په وینا، د ملګرو ملتونو په راپورونو کې څو ځله په افغانستان کې د ترهګرو ډلو شتون او فعالیتونه مستند شوي او طالبان باید په دې اړه ځوابویونکي وبلل شي.
فایق ټینګار کړی چې «د افغانستان خاوره باید هېڅکله د ترهګرو لپاره پر خوندي پټنځای او یا د نورو هېوادونو پر وړاندې د ګواښونو پر مرکز بدله نه شي.»
هغه پر افغانستان د پاکستان هغه بریدونه چې پاکستان یې د ترهګرۍ پر وړاندې مبارزه بولي، «غیرقانوني» بللي او ویلي یې دي: «د ترهګرۍ پر وړاندې مبارزه نشي کولای غیرقانوني بریدونه او یا د ملکي وګړو ژوند ته نه پاملرنه توجیه کړي. د افغانستان خلک باید د ترهګریز تاوتریخوالي او یا د هغو پوځي غبرګونونو بیه ورنه کړي چې د دوی ژوند او معیشت له ګواښ سره مخ کوي.»
هغه له نړیوالې ټولنې وغوښتل چې د یوه «دوامدار غبرګون» په ترڅ کې له یوه مشروع، ځوابویونکي او ټولشموله حکومت څخه ملاتړ وکړي؛ هغه حکومت چې د افغانستان د خلکو پر اراده ولاړ وي او د هېواد د نړیوالو ژمنو د ترسره کولو وړتیا ولري.
په ملګرو ملتونو کې د افغانستان د استازولۍ سرپرست د ښځو او نجونو د حقونو پر بېرته راژوندي کولو او د ښځو د بشپړ مشارکت پر تضمین هم ټینګار کړی او ویلي یې دي چې د ترهګرۍ پر وړاندې د اغېزمنې مبارزې لپاره باید یو اصولي او همغږی نړیوال چلند غوره شي.
