د اوکراین چارواکو ویلي، چې د روسیې په بریدونو کې د زاپوریژیا په ښار کې لږ تر لږه ۱۱ کسان، د درېیو ماشومانو په ګډون، وژل شوي دي.
د فرانسې خبري اژانس د راپور له مخې، د اوکراین ملي پولیسو ویلي، چې روسیې نن سهار (شنبه، د میزان ۱۸مه) د «پنځو هدایتکېدونکو هوايي بمونو» په کارولو سره د دغه ښار استوګنې سیمې په نښه کړې او دوه استوګنیزې ودانۍ یې ویشتلې دي.
دغه بریدونه په میامي کې د اوکرایني او اروپايي چارواکو تر لیدنې یوه ورځ وروسته شوي دي. دا لیدنه د اوکراین د جګړې د پای ته رسولو لپاره د نویو ډیپلوماټیکو هڅو په لړ کې ترسره شوې وه.
د زاپوریژیا د سیمهییزې پوځي ادارې مشر میخایلو سمیکین ویلي: «پر زاپوریژیا د هوايي بریدونو د مرګژوبلې شمېر لا هم لوړېږي. تر اوسه ۱۱ ملکي وګړي وژل شوي، چې درې یې ماشومان دي.»
هغه ویلي، چې د ژغورنې ډلې لا هم د هغو کسانو لټون کوي چې تر خاورو او ودانیو لاندې بند پاتې دي.
د فرانسې خبري اژانس خبریال په سیمه کې لیدلي، چې د اوکراین د بېړنیو خدمتونو ځواکونو کسان له خاورو او کنډوالو راایستل.
یو رضاکار ژغورونکي دانییل پیشکین فرانسې خبري اژانس ته ویلي: «تر کنډوالو لاندې مو کسان ولیدل؛ یوه ښځه، مېړه یې او یو ماشوم.»
هغه زیاته کړې، چې دوه کسان یې له کنډوالو ژوندي راایستل، خو «له بده مرغه یوه کوچنۍ نجلۍ مړه شوې وه».
۶۹ کلنې ایرینا، چې په نښه شویو ودانیو کې اوسېده، ویلي، د هوايي برید د خبرداري له ترلاسه کولو وروسته یې یوازې دومره وخت وموند، چې تشناب ته پناه یوسي.
هغې ویلي، دوه ګاونډیانې یې وژل شوې دي.
ایرینا فرانسې خبري اژانس ته ویلي: «هغوی ۷۵ کلن وو. بهر، سړک ته وغورځول شول. روغتون ته ونه رسېدل.»
د زاپوریژیا سیمه، چې د جګړې له لومړۍ کرښې څو لس کیلومتره لرې ده، او د همدې نوم مرکز یې څو ځله د بریدونو هدف ګرځېدلي دي.
روسیې په وروستیو میاشتو کې د اوکراین پر خاوره خپل بریدونه زیات کړي، چې له امله یې د ملکي وګړو د مرګژوبلې شمېر لوړ شوی دی.
د روسیې پر اوکراین تر یرغل څه باندې څلور کاله وروسته، د جګړې د پای ته رسولو لپاره د امریکا په منځګړیتوب ډیپلوماټیکو هڅو تر اوسه کومه پایله نه ده ورکړې.
