د فرانسې خبري اژانس د درېیو عیني شاهدانو په حواله راپور ورکړی، چې نن (شنبه، د تلې ۱۸مه) د سعودي عربستان په پلازمېنه ریاض کې د دغه هېواد د نړیوال هوايي ډګر د تخلیې بهیر روان و.
دغه رسنۍ لیکلي، چې په همدې وخت کې سعودي چارواکو له مسافرو غوښتي وو، چې هوايي ډګر ته تر تګ مخکې د خپلو الوتنو وضعیت وڅېړي.
یوه عیني شاهد ویلي، چې د ریاض په نړیوال هوايي ډګر کې د الوتکې د سپرېدو لپاره د انتظار پر مهال یې د چاودنې غږ واورېد؛ خو دوو نورو کسانو ونه شوای کولای تایید کړي، چې د هوايي ډګر د تخلیې لامل څه پېښه وه.
په وروستیو ورځو کې د ریاض نړیوال هوايي ډګر څو ځله د یمن د حوثیانو د توغندیزو او بېپیلوټه الوتکو بریدونو هدف ګرځېدلی دی.
د سعودي عربستان د ملکي هوايي چلند ادارې پرون تایید کړه، چې د پنجشنبې په ورځ د حوثیانو په بریدونو کې لږ تر لږه درې کسان وژل شوي او یو شمېر نور ټپیان شوي دي.
دې ادارې ویلي وو، چې د تېرې اوونۍ د دوشنبې او سېشنبې په ورځو هم د حوثیانو په بریدونو کې د ریاض په نړیوال هوايي ډګر کې یو کس وژل شوی او اته نور ټپیان شوي وو.
حوثیانو د تېرې اوونۍ د دوشنبې او سېشنبې په ورځو په سعودي عربستان کې د ابها هوايي ډګر هم په نښه کړی و، چې په پایله کې یې دوه کسان وژل شوي او ۲۸ نور ټپیان شوي وو.
