په لوېدیځ کابل کې سرچینې وایي، څلور تنکي ځوانان وروسته له هغې طالبانو نیولي او بخښنې ته یې اړ کړي، چې د موټرسایکلسازې شرکت د محصولاتو په اړه یې طنزي او انتقادي ویډیو جوړه کړې وه.
یوې سرچینې اطلاعات روز ورځپاڼې ته په یوه پیغام کې د دغو تنکیو ځوانانو نومونه عصمتالله نظري، حمید تک، مرتضی عليزاده او مهدي حیدري یاد کړي او ویلي یې دي، چې هغوی د تېرې اوونۍ د دوشنبې په ورځ نیول شوي وو او شاوخوا یوه ورځ یې د برچي په ۱۸مه حوزه کې د طالبانو په بند کې تېره کړې وه.
د سرچینې په وینا، په هغو ویډیوګانو کې چې د حوزې دننه ثبت شوې، دغو ځوانانو د موټرسایکلسازې شرکت څخه بخښنه غوښتې ده. ویډیوګانې د ځوانانو په خپلو کارنحسابونو کې خپرې شوې وې، خو وروسته ړنګې شوې. اوس دا ویډیوګانې په ټولنیزو شبکو کې د کاروونکو ترمنځ لاس په لاس کېږي. کاروونکو د طالبانو پر دې اقدام نیوکه کړې او هغه یې غیرانساني بللی دی.
سرچینې ادعا کړې، چې په دشت برچي کې د موټرسایکلسازې شرکت استازي په امنیتي حوزه کې د خپلو اړیکو او واسطې په کارولو سره دغه ځوانان نیولي دي.
د سرچینې په وینا، طالبانو دغو ځوانانو ته ګواښ کړی، چې که له رسنیو سره خبرې وکړي، بیا به یې ونیسي.
